Xitoyning Xiaomi kompaniyasi yangi Mi 11 smartfonini rasman taqdim etdi. Gadjetning onlayn taqdimoti 28-dekabr kuni o‘tkazildi, deb xabar beradi “Korrespondent.net”.
Telefonga QHD+ sifatga va 120 gertsli yangilanish chastotasiga ega 6,81 dyuymli AMOLED-displey o‘rnatilgan. Displey so‘nggi avlod Gorilla Glass Victus shishasi bilan qoplangan bo‘lib, u suvga o‘tkazmaslik va tirnalishlarga ikki karra bardoshli. Ekran ostida barmoq izi skaneri joylashgan, u o‘zining asosiy funksiyasidan tashqari pulsni o‘lchaydi, shuningdek, selfi-kamerani ishga tushira oladi.
Xiaomi Mi 11 Qualcomm Snapdragon 888 protsessorida ishlaydigan birinchi smartfonga aylangan. Shuningdek, qurilmaga 8 yoki 12 gigabaytli tezkor va 128/256 gigabaytli ichki xotira o‘rnatiladi. Smartfonlarning barcha versiyasi 5G aloqa tarmog‘ini qo‘llab-quvvatlaydi.
F/1,85 diafragmasi, 25 millimetrli fokus masofasi va optik barqarorlashtirgichga ega 108 megapikselli kamera Xiaomi Mi 11’ning muhim jihatiga aylangan. Bundan tashqari, unga 13 megapikselli keng burchakli obyektiv va 5 megapikselli makroobyektiv ham o‘rnatilgan.
Qurilma sig‘imi 4600 mA/soatga teng akkumulyator yordamida ishlaydi va tezkor quvvatlanish funksiyasiga ega.
Smartfon narxi uning xotirasi hajmiga bog‘liq bo‘lib, 610 dan 720 dollar atrofida. Yangi model beshta rangda taqdim etilgan, jumladan, ularning ikkita qoplamasi charm kabi ko‘rinishga ega.
Avvalroq Xiaomi Mi 11 qutisidan quvvatlantirgich o‘rin olmasligi rasman ma’lum qilingan edi.
Izoh (0)