Buxoro vilotyatining Kogon tumanida yashovchi 33 yoshli ayol poyezd urib ketishi oqibatida halok bo‘ldi. Bu haqda Buxoro viloyati IIB matbuot xizmati xabar berdi.
Ma’lum bo‘lishicha, 18-dekabr kuni Nukus—Buxoro—Toshkent yo‘nalishidagi poyezd soat 23:18 da harakatlanib ketayotgan vaqtda ayolni urib ketgan. Ayol olgan tan jarohatlaridan voqea joyida vafot etgan.
Xabarda aytilishicha, halok bo‘lgan ayol Kogon shahridagi shifoxonada hamshira bo‘lib ishlab kelgan bo‘lib, uning ikki nafar voyaga yetmagan farzandi bor.
Avvalroq Toshkent viloyatida “elektrichka” temiryo‘l relslari orasida yotgan mast erkakni turtib yuborgani, Xorazmda temiryo‘l relsi yonida uxlab qolgan mast fuqaro sabab Xiva—Toshkent poyezdi 16 daqiqa to‘xtab qolgani, Samarqandda yuk poyezdi quloqchin taqqan yigitni urib ketmaslik uchun favqulodda to‘xtashni amalga oshirgani, Samarqand viloyatida poyezd urib ketishi oqibatida uch kishi, jumladan, 8-sinf o‘quvchisi halok bo‘lgani to‘g‘risida xabar berilgandi.
Izoh (0)