Ijtimoiy tarmoqlarda 2020-yilning 25-dekabr kuni “Samarqandda haydovchilik guvohnomasi bo‘lmagan fuqaroga jarima keldi” sarlavhasi ostidagi xabar tarqaldi, deya ma’lum qilmoqda YHXBB.
Xabar o‘rganilganda, 2019-yil 8-iyul kuni Samarqand viloyati IIB YHXB YPX xodimi F.Xudoyberdiyev tomonidan Samarqand shahar, M.Ulug‘bek ko‘chasida piyodalarga yo‘l bermasdan harakatlangan SAZ HC40 rusumli avtobus haydovchisi Tohirov Saidisroil Akbar o‘g‘liga nisbatan belgilangan tartibda bayonnoma rasmiylashtirilgan.
Viloyat IIB YHXB YPXB ma’muriy amaliyot xodimi O.Mo‘minov tomonidan fuqaro Tohirov Saidisroil Akbar o‘g‘liga nisbatan tuzilgan bayonnoma KAAT markazlashgan dasturiga kiritilishi vaqtida xodimning e’tiborsizligi sabab Ishtixon tumani, “Zarband” QFYda yashovchi fuqaro Toirov Sardor Akbar o‘g‘li ma’lumotlari bilan tizimga xato kiritilgan va jazo qo‘llash to‘g‘risidagi jarima qarori chiqarilgan.
YHXBB xabarida Samarqand viloyati Ishtixon tumani “Zarband” QFYda yashovchi fuqaro Toirov Sardor Akbar o‘g‘liga nisbatan chiqarilgan qaror belgilangan tartibda bekor qilinganligini va xatolikka yo‘l qo‘ygan xodimga nisbatan xizmat tekshiruvi o‘tkazilayotganligini ma’lum qilib, yo‘l qo‘yilgan kamchiliklar uchun uzr so‘ralgan.
Avvalroq Sirdaryoda 3 yil avval vafot etgan haydovchiga jarima kelgani hamda Jizzaxda xizmat mashinasi yo‘l qoidasini buzgan YPX xodimiga chora ko‘rilgani haqida xabar berilgandi.
Izoh (0)