Aras Bulut bosh qahramon rolini ijro qilgan “Yettinchi bo‘lmadagi mo‘jiza” (Yedinci Koğuştaki Mucize) filmi efirga uzatish uchun Meksika, Chili, Kolumbiya, Ekvador, Salvador, Gonduras, Isroil va Dominikan Respublikasi tomonidan sotib olindi. Bu haqda “KinoTeka” xabar beradi.

Foto: Hürriyet

Avvalroq Turkiya Madaniyat vazirligi 2021-yil 23-aprelda Los-Anjelesda bo‘lib o‘tadigan “Oskar” mukofotining 93-taqdirlash marosimiga Mehmet Ada O‘ztekin rejissorligidagi ushbu film nomzod sifatida tanlab olingani haqida xabar berilgandi. Netflix platformasida taqdim qilinganidan keyin yanada e’tibor oshgan ushbu filmga qiziqish tobora ortib borayotgan bo‘lib, tez orada u bilan bog‘liq bir qancha yangi kelishuvlar e’lon qilinadi.

Janubiy Koreyaning xuddi shu nomli filmining uchinchi remeyki bo‘lgan “Yettinchi bo‘lmadagi mo‘jiza”da hayotdagi nohaqlik va adolatsizliklar Memo ismli qahramon va uning qizi bilan bog‘liq voqea asosida hikoya qilinadi.

Sujetga ko‘ra, aqlan rivojlanmay qolgan, ammo birovga zarari tegmaydigan qahramon noto‘g‘ri vaqtda, to‘g‘ri bo‘lmagan joyda bo‘lib qolgani tufayli dahshatli jinoyatda ayblanadi va o‘lim jazosiga hukm qilinadi. Qamoqdagi beayb Memo va qizining kechinmalari, ota-bola o‘rtasidagi “telbalarcha” sevgi hamda voqealar rivoji muxlislarni ekran qarshisiga mixlab qo‘yadi.

Aras Bulut ijrosi muvaffaqiyatini ta’minlagan filmda, shuningdek, Ilker Aksum, Mesut Akusta va Deniz Baysal suratga tushgan.