Toshkentda 23-dekabr kuni Tashkent City TikTok Awards 2020 taqdimot marosimi bo‘lib o‘tdi. Tadbir, tashkilotchilarning so‘zlariga ko‘ra, TikTok’da muvaffaqiyatga erishgan iqtidorli yoshlarni qo‘llab-quvvatlash va O‘zbekistonda videobloggingni ommalashtirish maqsadida uyushtirilgan.
Taklif qilingan mehmonlar orasida DJ Piligrim, Shohruxxon, Munisa Rizayeva, Sitora Farmonova, Sabina Mustayeva, Alisher Uzoqov, Shahram Giyasov kabi mashhurlar bor edi. Tadbirning eng katta mehmoni esa Rossiyaning eng serdaromad tiktokchisi, asli o‘zbekistonlik Rahim Abramov bo‘ldi. U bloger “Yil heshtegi” yo‘nalishida g‘olib deb topilgan Doniyor Qayumovga mukofot topshirdi.
Taqdimotda Toshkent shahar hokimi Jahongir Ortiqxo‘jayev ham qatnashdi. Hokim ushbu tadbirni “nafaqat O‘zbekistonda, balki dunyoda birinchi marta o‘tkazilayotgan tiktokerlar bayrami” deb atab, bu bilan barchani tabrikladi va tiktokchilarning ijodiga omad tiladi. U “Yil tavsiyasi” yo‘nalishida eng yaxshi deb topilgan Littos duetiga mukofotni topshirdi.
G‘oliblar ro‘yxati bilan quyida to‘liq tanishish mumkin:
- @xusnidd1n — yilning eng iqtidorli tiktokchisi;
- @sokolov_artyom — yil davomida eng tez o‘sgan akkaunt;
- @nadirsailov — yil davomida eng ko‘p tomosha qilingan video muallifi;
- @krasivaya_688 — Crafers tanlovi bo‘yicha eng yaxshi;
- @littos — “Yil tavsiyasi” yo‘nalishi g‘olibi;
- @abu_vines — “Aktyor/Yumor” yo‘nalishi g‘olibi;
- @komolqohhorov1 — eng mehribon tiktokchi;
- @amirceek01 — TikTok’dagi eng yaxshi raqqos;
- @diyorik_azimova — “Yil chellenji” yo‘nalishi g‘olibi;
- @jonyrinko — eng yaxshi montajchi;
- @saidahmad_umarov — “Musiqali TikTok” yo‘nalishi g‘olibi;
- @doniyorkayumov — “Yil heshtegi” yo‘nalishi g‘olibi.
Mavzuga doir:
Humans kompaniyasidan ma’lum qilishlaricha, 2020-yilning oktabr oyining o‘zida operatorning o‘zbekistonlik foydalanuvchilari TikTok’ga 246,1 terabayt trafik sarflagan — bu Telegram (314,5 terabayt) va YouTube (303,5 terabayt)dan keyingi eng yuqori uchinchi ko‘rsatkich.
TikTok’ning auditoriyasi boshqa ijtimoiy tarmoqlardan aynan demografiyasi bilan farqlanadi (unda asosan yoshlar va ko‘proq qizlar o‘tiradi). Taqqoslash uchun, The Tower MMG va Makro’ning marketing kommunikatsiyalari bo‘yicha menejeri Denis Romanning aytishicha, Instagram va Facebook’dan asosan erkaklar foydalanadi.
Izoh (0)