21-dekabr kuni Ulyanovskda axlat konteyneriga tashlab yuborilgan oq-qora rangli mushuk qutqarib olindi. Chiqindilarni saralash kompleksi xodimi og‘zi bog‘langan qop chiqindi separatoriga tushib ketishiga bir necha soniya qolganida uning ichidan mushukni chiqarib olgan, deb xabar beradi Meduza.
Mushukni qutqargan saralovchi Mixail Tukashning so‘zlariga ko‘ra, u o‘z majburiyati bo‘yicha qopning ichida metall bor-yo‘qligini aniqlash maqsadida qopni ushlab ko‘rgan.
“Paketni qo‘limga olganimda ichida yumshoq nimadir borligini sezdim. Qopni ozgina joyini kesganimda ichida menga qarab turgan ko‘zlarni ko‘rdim. Shundan so‘ng, kattaroq kesib, mushukni chiqarib oldim. Qiziq jihati, u miyovlamas, qop ichida qimirlamas ham edi. Shunda tirik jonivorni chiqarib oldim. Mushuk yaxshi qaralgan, boqilgan edi, boshpanasiz emasligi ko‘rinib turardi”, — deydi Tukash.
Avvaliga mushuk korxonaning o‘zida olib qolingan, 23-dekabr kuni u Ulyanovsk viloyati Tabiat va siklik iqtisodiyot vazirligiga ko‘chib o‘tgan. Idora rahbari Gulnara Rahmatulinaning aytishicha, endilikda vazirlikning barcha xodimlari unga javobgar. “Mushuk bevosita vazirlikda yashaydi, asosan, qabulxonada”, — deydi idoradagilar.
Vazirlik mushukning yangi ish joyiga aylangan. Uning uchun maxsus norasmiy lavozim — vazir o‘rinbosari lavozimi joriy etilgan.
Vazirlik mushukni qutqarib qolgan Mixail Tukash va uning boshlig‘iga minnatdorchilik xatini yuborgan. Bundan tashqari, korxona rahbariyati Tukashga pul mukofoti bilan taqdirlashga ham va’da bergan.
Izoh (0)