Ispaniya va Xorvatiyada 23-dekabrdan koronavirus infeksiyasi bilan kasallanganlar soni o‘sishi tufayli mamlakat ichida shaharlararo qatnash taqiqlandi, deb yozadi “RBK”.
Xorvatiya hukumati qaroriga ko‘ra, cheklovlar 8-yanvargacha uzaytiriladi. Kasbi yuzasidan yoki shoshilinch ishlar chiqib qolgan taqdirda boshqa shaharga ketishga majbur bo‘lib qolgan odamlar uchun maxsus ruxsatnomalar ko‘zda tutiladi. Shaharlararo qatnovni cheklashdan tashqari, hukumat uyda o‘n kishidan ortiq odam ishtirokida tadbirlar o‘tkazishni ham taqiqladi. Hujjatda qayd etilishicha, bitta binoda ko‘pi bilan ikkita oila to‘planishi mumkin. Ommaviy tadbirlar uchun Xorvatiyada ruxsat berilgan. Mahalliy aholi 24 va 25-dekabr kunlari o‘tkaziladigan Rojdestvo ibodatlarida ishtirok eta oladi.
Hududlararo qatnovlar bilan bog‘liq cheklovlar Ispaniya hukumati raisi Pedro Sanches tomonidan ham qabul qilindi. Ushbu tavsiyalar milliy rejada tasdiqlangan edi. Ular 23-dekabrdan 6-yanvargacha davom etishi kerak. Biroq El Pais gazetasi yozishicha, hududiy hukumatlar ushbu qoidalarni o‘zlariga moslashtirishi mumkin. Avvalroq Rojdestvo bayramlari vaqtida chegarani kirish va chiqish uchun yopib qo‘yish niyati haqida Valensiya hukumati xabar bergandi.
Jahon sog‘liqni saqlash tashkiloti (JSST) ma’lumotlariga ko‘ra, pandemiya boshidan buyon Ispaniyada 1 million 797,2 mingdan ortiq kishida koronavirus aniqlangan. 48,9 mingdan ziyod bemor vafot etgan. Xorvatiyada esa 195,7 ming kishi kasallangan, 3275 kishi vafot etgan.
Bir qator Yevropa mamlakatlari Rojdestvo va Yangi yil bayramlari kuni ham amalda bo‘ladigan cheklovlarni joriy qilmoqda. Xususan, Angliya sharqida va janubi-sharqida, shu jumladan, Londonda ham 20-dekabrdan cheklovlarning yangi, to‘rtinchi darajasi amal qilishni boshladi. Yangi cheklovlar kamida ikki hafta amal qiladi. Ular koronavirusning yangi turi tarqalgani tufayli joriy etilmoqda. Germaniyada koronavirus bilan bog‘liq og‘ir vaziyat tufayli 16-dekabrdan boshlab kamida 10-yanvarga qadar davom etuvchi qat’iy lokdaun joriy etildi. Fransiya bosh vaziri Jan Kasteks esa mamlakatda 15-dekabrdan komendantlik soatini e’lon qildi, u soat 20:00 dan soat 06:00 gacha amal qiladi. Komendantlik soati Yangi yil kechasi ham kuchda bo‘ladi.
Izoh (0)