Ijtimoiy tarmoqlarda Farg‘ona viloyatida Yangi yil archasi yonayotgani tasvirlangan video tarqaldi. “Daryo” muxbirining aniqlik kiritishicha, yonayotgan archa Farg‘ona shahridagi markaziy dehqon bozori oldiga o‘rnatilgan archa bo‘lgan.
Ta’kidlanishicha, Yangi yil archasi o‘rnatilayotgan paytda archani bezab turgan chiroqlarda qisqa tutashuv sabab yong‘in kelib chiqqan va archa to‘liq yonib ketgan.
Farg‘ona viloyat Favqulodda vaziyatlar boshqarmasi bergan ma’lumotga ko‘ra, boshqarmaga archa yonayotgani to‘g‘risidagi xabar 2020-yil 23-dekabr kuni soat 13:26 da kelib tushgan.
Yong‘inni bartaraf qilish uchun 1 ta yong‘in qutqaruv ekipaji jalb etilgan. Chaqiruvga soat 13:27 da chiqilib, 13:30 da yetib borilgan. Yong‘in 13:31 da qurshab olinib, 13:33 da to‘liq o‘chirilgan. Yong‘in oqibatida jarohat olganlar va qurbonlar yo‘q.
Hozirda holat yuzasidan tergovga qadar surishtiruv harakatlari olib borilmoqda.
Favqulodda vaziyatlar boshqarmasi uylar, ishxonalar va boshqa muassasalarda archa o‘rnatishda xavfsizlik qoidalariga rioya qilishga chaqirgan.
Izoh (0)