Daniya va Braziliyada koronavirusning yangi mutatsiyalari aniqlandi

Daniya va Braziliyada COVID-19 koronavirus infeksiyasining yangi mutatsiyalari aniqlandi, deb yozadi “RBK”.

Daniyada koronavirus mutatsiyasi topilgani haqida Yuqumli kasalliklarga qarshi kurash davlat universiteti ma’lum qildi. Tadqiqot olib borgan olimlar koronavirusning vaksinaga nisbatan ta’sirchanligi kamroq bo‘lgan N439K mutatsiyasini aniqlashga muvaffaq bo‘lgan. Ularning ma’lumotlariga ko‘ra, mamlakatda infeksiyaga test topshirib, tashxisi tasdiqlangan barcha odamlarning taxminan 10 foizida aynan shu mutatsiya bor. N439K’ga chalinganda kasalxonaga yotiqizishlar darajasi SARS-CoV-2’ga chalingandagiga nisbatan kamroq, degan xulosaga keldi olimlar.

Braziliyalik olimlar esa koronavirusning yangi shtammini Rio-de-Janeyro shtatida aniqladi. Bunda gap mamlakat hududida tarqalishga ulgurgan B.1.1.28 mutatsiyasi haqida bormoqda. Olimlar ma’lumotlariga ko‘ra, shtamm yuqumliroq ekanligi yoki ishlab chiqilayotgan vaksinalarning samaradorligiga ta’sir qilishi mumkinligi haqida hozir hech qanday dalillar yo‘q.

Koronavirusning yangi shtammlari yoki uning mutatsiyalari aniqlangani haqida ba’zi davlatlar yozdayoq xabar bergan edi. Masalan, iyul oxirida koronavirusning yuqumliroq turi paydo bo‘lgani haqida Vyetnam hukumati ma’lum qildi. U Danangda aniqlangan, shundan keyin shahardan 80 ming kishi evakuatsiya qilindi. Ammo Jahon sog‘liqni saqlash tashkiloti (JSST) shundan keyin Danangda aniqlangan virus turi yuzasidan xavotirlanish uchun asos yo‘qligini aytdi, chunki tashkilot ma’lumotlariga ko‘ra, uning yanada yuqumliroq ekanligi bo‘yicha dalillar yo‘q edi. Avgustda COVID-19’ning yangi shtammi haqida Indoneziyada xabar berildi. Jakartada joylashgan molekulyar biologiya instituti ma’lumotlariga ko‘ra, shtamm koronavirusga chalingan indoneziyaliklarning 40 foizida aniqlangan.

Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfliroq emas.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Hozirda tashkilot bu shtammni o‘rganmoqda.

Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi.

Yangi shtamm sabab Saudiya Arabistoni, Rossiya va 20 dan ortiq mamlakat aviaqatnovlarni chekladi. Shu jumladan, O‘zbekiston ham sakkiz davlat bilan aviareyslarni to‘xtatdi.