Qashqadaryo hokimi Zoir Mirzayev viloyatda faoliyat yuritayotgan 15 nafar tuman va shahar hokimlari o‘ziga biriktirilgan elchixonalar bilan muloqot qilmayotganini tanqid qildi. Bu haqda 21-dekabr kuni viloyat rahbari raisligidagi yig‘ilishda ma’lum qilindi, deya xabar berdi “Daryo” muxbiri.
Viloyat hokimining ma’lumot berishicha, hudud hokimlariga elchixonalar bilan muloqot qilish, ularga taklif berish va hamkorlikni yo‘lga qo‘yish vazifasi yuklatilgan. Biroq aksariyat hokimlar bu vazifani umuman bajarmagan.
Viloyat rahbari bilan muloqot qilgan Qamashi va Qarshi tumani hokimlari — Botir Tog‘ayev va Maqsuda Mustafoyeva haqiqatan ham elchixonalarga biriktirilganini, biroq yuklatilgan vazifani hali bajarmaganini tan olgan.
“Haqiqatan ham elchixonalar bilan hali muloqot qilmadik. Ayb o‘zimizda”, — degan Qarshi tumani hokimi Maqsuda Mustafoyeva.
Zoir Mirzayevning bu haqdagi savoliga javob bergan Qarshi shahri hokimi Normo‘min Xolboyev unga Turkiya, Germaniya va Hindiston elchixonalari bilan muloqot qilib, hamkorlik qilish vazifasi yuklatilganini aytib, hozircha Turkiya elchixonasi bilan muloqot qilganini va hamkorlikni yo‘lga qo‘yganini ma’lum qilgan.
Qashqadaryo viloyati rahbari tuman va shahar hokimlariga murojaat qilib, Rossiyada Farg‘ona viloyatida yetishtirilgan pomidor va qalampirlarga taqiq qo‘yilgach, Farg‘onadagi ikki nafar tuman hokimi bu taqiqni olib tashlash uchun elchixonalar bilan muloqot qilganini, mas’ullarning holatni aniqlashtirish uchun jon kuydirganini namuna qilib ta’kidlagan.
Eslatib o‘tamiz, avvalroq Qarshi tumani hokimi Maqsuda Mustafoyeva betobligi sabab tuman aholisiga hokimsiz murojaatnoma yo‘llangandi. Bu esa ijtimoiy tarmoqlarda ko‘plab muhokamalarga sabab bo‘ldi.
Izoh (0)