Namanganda Energetika xodimlari kuni munosabati bilan soha mutasaddilariga 25 ta “Gazel” maxsus brigada mashinasi, laboratoriya-sinov maxsus texnikasi va kran-manipulyator topshirildi. Bu haqda “Daryo” muxbiri Azizbek Abduvaliyev xabar bermoqda.

Shuningdek, viloyatning Uychi va Namangan tumanlarida mijozlar bo‘limlarining yangi binolari ham o‘z faoliyatini boshladi.

“Namangan hududiy elektr tarmoqlari” korxonasi tomonidan yangi “Gazel” mashinalariga oziq-ovqat to‘plamlari va maishiy texnika ortilib, viloyatdagi “Temir daftar”ga kirgan 350 ta oilaga tarqatilmoqda.

— Energetiklar kuni va Yangi yil bayrami munosabati bilan turli tadbirlar o‘tkazishdan voz kechib, ehtiyojmand oilalarni yo‘qlashni ma’qul ko‘rdik. Ularning duosi bizning xatarli va mashaqqatli faoliyatimizda albatta kor keladi, — deydi “Namangan hududiy elektr tarmoqlari” korxonasi rahbari Jahongir Rizayev.

Ma’lumot uchun, Namangan viloyatida 2021-yilda 850 kilometr elektr tarmog‘i qurilishi va 270 ta transformator punki o‘rnatilishi rejalashtirilgan. Buning natijasida viloyatda energetika tizimida ish hajmi bajarilishi 30 foizga ortishi kutilmoqda.