Toshkent shahri Shayxontohur tumanida joylashgan “Malika” savdo majmuasida 21 yoshli va 27 yoshli ikki yigit o‘rtasida yuzaga kelgan janjal pichoqbozlik bilan tugadi. Bu haqda Ichki ishlar vazirligi huzuridagi Tergov departamenti xabar berdi.
Ma’lum qilinishicha, 2020-yilning 8-dekabr kuni soat 13:40 da Shayxontohur tumani “Taxtapul” mahallasi Kichik halqa yo‘li ko‘chasida joylashgan “Malika” savdo majmuasining asosiy kirish darvozasi oldida 21 yoshli Saidahmad X. 27 yoshli Rustam M. bilan janjallashib qolgan. Janjal davomida Saidahmad X. qo‘lidagi “pakki” pichog‘i bilan Rustam M.ning bel va o‘ng lunj sohasiga tan jarohati yetkazgan.
Sud-tibbiy ekspertiza xulosasiga ko‘ra, Rustam M.ning tanasida bel sohasi chap yarmi sanchib kesilgan jarohati, o‘ng lunj sohasi kesilgan jarohatlari mavjudligi, ular o‘rtacha og‘ir tan jarohatlari ekanligi aniqlangan.
Mazkur holat yuzasidan Shayxontohur tumani bo‘yicha IIO FMB huzuridagi Tergov bo‘limi tomonidan Jinoyat kodeksining 277-moddasi 2-qismi “v” bandi (sovuq qurol yoki kishining sog‘lig‘i uchun amalda shikast yetkazishi mumkin bo‘lgan narsalarni (qurol sifatida) namoyish qilib, ularni qo‘llash bilan qo‘rqitib yoxud qo‘llab bezorilik qilish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Eslatib o‘tamiz, “Malika” savdo majmuasida 2018-yilda ham ikki marta pichoqbozlik yuz bergandi.
Izoh (0)