Samarqand viloyatining Kattaqo‘rg‘on tumanida 9 tup chinor daraxtini o‘zboshimchalik bilan kesgan fuqaro tabiatga yetkazilgan zarar uchun 274 million 290 ming so‘m jarima to‘ladi, deya xabar berdi “Daryo” muxbiri.
Samarqand viloyat Ekologiya va atrof-muhitni muhofaza qilish boshqarmasi axborot xizmatining aniqlik kiritishicha, Kattaqo‘rg‘on tumani “Melixo‘ja” MFYning Enamyaxshi qishlog‘ida yashovchi fuqaro U.Z. 2019-yilning dekabr oyida ruxsatsiz Ravot qishlog‘ida joylashgan “Grand trans” MMTP hisobida bo‘lgan dala shiyponi atrofida joylashgan 9 tup chinor daraxtini kesib tashlagan.
Bu holat Kattaqo‘rg‘on tuman Ekologiya va atrof-muhitni muhofaza qilish inspeksiyasi davlat inspektorlari tomonidan 2020-yilning 30-yanvar kunida aniqlanib, qonunda belgilangan tartibda rasmiylashtirilgan.
2020-yilning 22-oktabr kuni Jinoyat ishlari bo‘yicha Kattaqo‘rg‘on tuman sudining ochiq sayyor sudida ayblanuvchi U.Z. Jinoyat kodeksining 198-moddasi 2-qismida nazarda tutilgan (o‘rmonlarni, daraxtlarni yoki boshqa o‘simliklarni qonunga xilof ravishda kesish ko‘p miqdorda zarar yetkazilishiga sabab bo‘lgan bo‘lsa) jinoyatni sodir etganlikda aybli deb topilib, unga nisbatan 2 yil 6 oy muddatga ozodlikni cheklash jazosi tayinlangan. Jazoni o‘z yashash joyida o‘tashi belgilangan.
Shuningdek, 10 oy muddatda Samarqand viloyat Ekologiya va atrof-muhitni muhofaza qilish boshqarmasi hisobiga tabiatga yetkazilgan 274 million 290 ming so‘m moddiy zarar undirilishi belgilangan bo‘lib, hozirda tuman majburiy ijro bo‘limi hamkorligida moddiy zararni undirish ishlari amalga oshirilmoqda.