Tog‘li Qorabog‘da joylashgan Shusha shahridagi yo‘llarni minalardan tozalash vaqtida rossiyalik sapyor halok bo‘ldi. Bu haqda Rossiya Mudofaa vazirligiga tayanib, Meduza xabar berdi.
“Portlovchi qurilma portlab ketdi. Portlash oqibatida Xalqaro minalarga qarshi kurash markazining minalardan tozalash guruhining ofitseri og‘ir tan jarohati oldi. Harbiy xizmatchiga zudlik bilan tibbiy yordam ko‘rsatilgan. Ofitserni gospitalga olib borish jarayonida u olingan tan jarohatlari oqibatida vafot etdi”, — deyiladi idora matbuot xizmati xabarida.
Eslatib o‘tamiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi.
Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.
Mavzuga doir:
Izoh (0)