Ozarbayjon hukumati koronavirus sababli 2021-yilning 1-martigacha Rossiya bilan chegaralar yopilishini ma’lum qildi. Bu haqda Ozarbayjonning Moskvadagi elchixonasiga tayanib, “RIA Novosti” xabar berdi.
Qayd etilishicha, tegishli choralar Rossiya va Ozarbayjonda koronavirus bilan kasallanganlar sonining ortgani, shuningdek, mamlakat ichida qat‘iy karantin choralari joriy etilgani sababli rasmiy Boku tomonidan qabul qilingan. Rossiya va Ozarbayjon o‘rtasidagi quruqlik chegaralari Dog‘iston Respublikasi va Xachmaz tumanlari orqali o‘tadi.
Avvalroq Ozarbayjon doimiy yo‘lovchi aviareyslari uchun 31-dekabrgacha havo chegaralarini yopgandi. 14-dekabrdan 18-yanvargacha mamlakatda qat’iy karantin rejimi e’lon qilingan, barcha restoranlar, kafelar va savdo markazlari yopilgan, odamlar o‘z uyini faqat maxsus SMS ruxsatnoma asosida tark etishi mumkin.
So‘nggi ma’lumotlarga ko‘ra, Ozarbayjonda 195 422 kishi koronavirus bilan kasallangan, 2133 kishi kasallik qurboniga aylangan, 131 252 kishi kasallikdan tuzalgan. Rossiyada pandemiya boshidan buyon koronavirus bilan kasallanish bo‘yicha 2 791 220 ta holat qayd etilgan. 49 762 kishi kasallik oqibatida vafot etgan, 2 228 633 kishi tuzalgan.
Izoh (0)