“Toshkent yoshlar forumi – 2020” doirasida o‘tkazilgan “Globallashuv davrida yoshlar migratsiyasi” mavzusida yoshlar bilan suhbat chog‘ida Akmal Saidov “Ikkita prezident davrida ham ishlab kelyapsiz. Bu nimaning hisobiga? Ya’ni tajribami, moslashuvchanlikdanmi?”, degan savolga javob berdi, deya xabar bermoqda “Daryo” muxbiri.
Men hech qachon kommunistik partiya a’zosi bo‘lmaganman. To‘g‘ri, partiyaga kirmoqchi bo‘lganman, lekin menga navbatingiz keldimi, deyishgan. Qolaversa, qayta qurish davrida partiyasizlar ham oldinga surilsin, faqat partiya a’zolari emas, degan gap bo‘ldi.Ma'lumot uchun, Akmal Saidov Toshkent viloyatining Zangiota tumanida tug‘ilgan. 1990-yilda yuridik fanlar doktori ilmiy darajasini, 1993-yilda xalqaro va qiyosiy huquq professori ilmiy unvonini olgan. 2017-yildan O‘zbekiston Respublikasi Fanlar akademiyasining haqiqiy a’zosi.Men o‘sha paytlari O‘zbekiston yoshlar tashkiloti rahbari bo‘lganman. Buni bir tasodif deyishim ham mumkin. Bundan keyin bir qancha hukumat ishlariga ehtiyoj sezishgan va men yordam berganman. Ya’ni mening yordamimga bo‘lgan ehtiyojning tug‘ilish sababi men jahon tajribasini, tillarni bilishimda va yuristligimda bo‘lgan.
Xususan, davlat tili haqidagi qonunni men yozganman va hech kimdan ko‘chirmaganman. Biz Ittifoqda birinchilardan bo‘lib 1989-yil 21-oktabrda tayyorlaganmiz. Men bu ishimdan g‘ururlanaman.
Keyingi ishlarim O‘zbekiston Respublikasi Konstitutsiyasini tuzishda bo‘ldi. Bunda mutaxassislarni ham jalb qilganmiz, xalqning fikrini ham olganmiz. To‘g‘risini aytaman, Birinchi Prezidentimiz Islom Karimov meni komsomolning birinchi kotibi qilmoqchi bo‘lgan, men yo‘q deganman. Men “Kotib bo‘ladiganlar ko‘p, mendan yuridik sohada foydalaning”, deb aytganman.
O‘ylaymanki, shuncha yildan beri ishlab kelishimga sabab o‘zimning bilimim bo‘lsa kerak. To‘qsoninchi yillarda xorijiy tillar bilan ishlaydigan yagona yurist bo‘lganman.
Lekin hozir til bilish juda katta e’tiborga loyiq holat bo‘lmay qoldi. Ayrim mutaxassislar o‘zining ona tilidan ham ko‘ra chet tilini yaxshi biladi. Bu holatni men qoralayman. Tarixdan o‘zbek ziyolisi kamida uchta tilni – o‘zbek tili, arab tili va fors tillarini bilgan. Bitta tilni bilgan odam bitta dunyo, ikkita tilni bilgan odam ikkita dunyo.
Qolaversa, yoshlar tashkilotidagi tajribam menga elchilik uchun yo‘l ochib bergandir. Bizda Inson huquqlari markazi ochilgan paytda O‘zbekiston eng tanqidga uchraydigan davlat edi. Salkam 20 yil O‘zbekiston qora ro‘yxatda bo‘lib kelgan. Inson huquqlari bo‘yicha mutaxassis hech qayerda alohida tayyorlanmaydi. Bu hayotiy tajriba va bilimdan kelib chiqadi.
Qisqasi, birinchi rahbar davrida yuridik doktor edim, hozir esa akademikman.
Akmal Saidov, O‘zbekiston Oliy Majlisi Qonunchilik palatasi Spikerining birinchi o‘rinbosari
Akmal Saidov 1994—1996-yillarda O‘zbekistonning Fransiyadagi favqulodda va muxtor elchisi, shuningdek, O‘zbekistonning YuNESKO huzuridagi doimiy vakili sifatida faoliyat ko‘rsatgan. Prezident farmoniga muvofiq, 1996-yil oktabr oyidan buyon Inson huquqlari bo‘yicha O‘zbekiston Respublikasi Milliy markazi direktori lavozimida ishlab kelmoqda. Shuningdek, O‘zbekiston Oliy Majlisi Qonunchilik palatasi Spikerining birinchi o‘rinbosari.
Izoh (0)