DXX Samarqand viloyati boshqarmasi va Bosh prokuratura huzuridagi departamentning hududiy boshqarmasi xodimlari hamkorligida o‘tkazilgan tezkor tadbir davomida Urgut tumanida fuqaroga 2 ming dollar evaziga yerga egalik huquqini olib berishni va’da qilgan kadastr xizmati xodimi ushlandi. Bu haqda DXX matbuot xizmati “Daryo”ga ma’lum qildi.
Ma’lumot qilinishicha, Samarqand viloyati Yer tuzish va ko‘chmas mulk kadastri davlat korxonasi Urgut tuman filialining mutaxassisi tumanning Sariqtepa mavzesi hududida joylashgan 15 sotix tashlandiq yer maydoniga egalik huquqini beruvchi tuman hokimining qarorini chiqartirib, tegishli kadastr hujjatlarini rasmiylashtirib berishni va’da qilgan. Buning evaziga u fuqarodan 2000 AQSh dollari olgan vaqtida ashyoviy dalillar bilan ushlandi.
Shuningdek, Jizzax viloyati Zarbdor tumani Yer resurslari va davlat kadastr bo‘limi xodimi Sharof Rashidov tumanida yashovchi fuqaroga chorvachilik fermer xo‘jaligi tashkil etishi uchun Zarbdor tumani hududidan 40 gektar yer maydoni rasmiylashtirib olishiga yordam berishini aytib, xizmati evaziga 2000 AQSh dollari talab qilgan.
DXX Jizzax viloyati boshqarmasi hamda viloyat prokuraturasi hamkorligida o‘tkazilgan tezkor tadbir davomida kadastr xodimi so‘ralgan puldan 10 million so‘mni olgan vaqtida ushlangan.
Hozirda mazkur holatlar yuzasidan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari doirasida ushbu noqonuniy ishlarga aloqador bo‘lgan boshqa shaxslarni aniqlash bo‘yicha chora-tadbirlar ko‘rilmoqda.
Avvalroq Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani, shuningdek, Toshkentda 352 ming dollarga yer sotmoqchi bo‘lgan tuman hokimligi mansabdori ushlangani to‘g‘risida xabar berilgandi.
Izoh (0)