“O‘zgidromet” Qamchiq dovonida kuchli qor yog‘ishi kutilayotgani sabab haydovchilarni ogohlantirdi

O‘zbekiston Gidrometeorologiya xizmati 19—20-dekabr kunlari Qamchiq dovonida kuchli qor yog‘ishi kutilayotganidan ogohlantirdi.

Qayd etilishicha, 19—20-dekabr kunlari A-373 Toshkent—O‘sh avtomobil yo‘lining Qamchiq dovoni qismida qor, vaqti-vaqti bilan kuchli qor yog‘ishi kutilmoqda.

“Dovonda tuman tushib, ko‘rinuvchanlik 50 metrgacha pasayishi, shamol tezligi sekundiga 17—22 metr, birdan 25—27 metrgacha kuchayishi mumkin. Yo‘lda qor uyumlari, yaxmalak hosil bo‘lishi kutilmoqda”, — deyiladi xabarda.

Avvalroq Qamchiq dovonida 14 soat ichida 13 ta mashina ishtirokida 3 ta YTH sodir bo‘lgani to‘g‘risida xabar berilgandi.

Eslatib o‘tamiz, 28-noyabr kuni A-373 Toshkent—O‘sh avtomobil yo‘lida qor ko‘chkisi xavfi yuzaga kelishi mumkinligi sabab Qamchiq dovonida transport vositalarining harakati vaqtinchalik to‘xtatilgan edi.