Amerikaning Viskonsin shtatida “vindxaund” zotli it odatdagidek bo‘lmagan uzun bo‘yni va oyoqlari tufayli Instagram va TikTok yulduziga aylandi. Bu haqda The Mirror xabar bermoqda.
Kleo laqabli ushbu bir yashar it o‘zgacha ko‘rinishi tufayli itni emas, balki jirafani eslatib yuboradi. Uning egasi Kler Pyuissan itni 2019-yil Ogayo shtatidan olib kelgan. Endilikda mashhur Kleoning Instagram sahifasida 26700 dan ortiq obunachi bor. It buning uchun turli rangdagi maxsus kiyimlarda suratga tushmoqda.
Muammo shundaki, Kleoning uzun oyoqlari tufayli unga doim ham mos kiyim topib bo‘lmaydi. “Sotuvdagi eng chiroyli kiyimlar ham qisqa va kichkina ko‘rinadi”, − deya shikoyat qiladi Pyuissan.
Shuningdek, uning egasi Kleoning Instagram’dagi muvaffaqiyatidan hayratda qolgan. “Men shunchaki uning nomiga sahifa yaratgandim, ammo Instagram va TikTok’dagi bunday e’tiborni kutmagandim to‘g‘risi”, − deya ta’kidlaydi uning egasi. Shuningdek, uning o‘ziga xosligi uzun bo‘yni va oyoqlarida ekanini ham qo‘shimcha qilib, Kleoni aqlli va quvnoq deb ta’riflaydi.
Amerikalik ayolning so‘zlariga ko‘ra, it sayr qilish, do‘stlari bilan o‘ynash va kunduz kuni jimgina uxlashni yoqtiradi. Bundan tashqari, Kleo Abelina laqabli 4 yashar it bilan birga yashaydi. Instagram foydalanuvchilari Kleoning sahifasida hamisha ajoyib sharhlar qoldiradi. Ulardan birida shunday deyilgan: “Sen model bo‘lishing mumkin. Eng yaxshi model. Buning uchun oyoqlaring juda mos keladi”.
Izoh (0)