Bosh kiyimlar uchun talab boshqa narsalar singari kiyimning ma’lum bir elementiga bo‘lgan muhabbatidan boshlangan. Oradan yillar o‘tsada, ularga bo‘lgan talab va tanlashdagi qonun-qoida o‘zgarishsiz qoldi.
XX asrdagi bosh kiyimlar turi hozirda har qanday odamni hayratga solishi mumkin: klosh, gaucho, tok, feska, kotelok, fedora, trilbi, kanotye, tirol shapka va boshqalar. XXI asrga kelib ayollarga bosh kiyim tanlashda biroz yengilliklar paydo bo‘ldi. Sababi ularning bir necha turi o‘z-o‘zidan urfdan qoldi.
Ammo bugungi kunga kelib sandiqda qolib ketgan bosh kiyimlari yana urfga kirmoqda. Bunday tendensiyani nafqat podiumlarda, balki shahar ko‘chalarida ham uchratish mumkin. Asosan 15 yoshdan 45 yoshgacha bo‘lgan ayollarning aksariyati bosh kiyimdan foydalanishni afzal ko‘radi.
Unga ko‘ra, sport uslubida kiyingan ayollar trikotaj bosh kiyimlarini, baland poshna va mo‘yna kiygan xonimlar esa klassik uslubdagi bosh kiyimlarida ko‘rish mumkin. Bosh kiyim asosan yuz shakliga ko‘ra tanlangani maqsadga muvofiq. Shundagina uning yarashgani yoki aksincha bo‘lishi mumkinligi vaqtida ayon bo‘ladi.
Dumaloq yuz
Yuzning yuqori qismini ochiq qoldiruvchi shlyapa va shapkalar siluetni vizual ravishda cho‘zadi va nisbatlarni muvozanatlashtiradi. Dumaloq yuz egalari to‘qilgan shapkalar, boshga assimetrik tarzda o‘rnatiladigan kozirokli shapkalar, yon tomonga kiyiladigan beretlar, yumshoq shlyapalar, quloqli shapkalardan foydalanishi mumkin. Lekin ular uchun kichkina va juda tor, tabletka shaklidagi shlyapa, bandanlar deyrali to‘g‘ri kelmaydi.
Uzunchoq yuz
Uzunchoq yuz xonimlari uchun “trilbi” uslubidagi klassik shlyapalar tavsiya etiladi. Shuningdek, kozirogi juda katta bo‘lmagan kepkalar, peshonani yopib turuvchi hajman katta beretlar, “gaucho”ga o‘xshash keng aylanali shlyapalarni ham kiyishi mumkin. Ammo ular peshonani to‘liq yopuvchi va bo‘yni baland ko‘rsatuvchi shlayapalardan voz kechish kerak. Shu bilan birga to‘qilgan shapkalar doim ham yarashavermasligi mumkin.
Uchburchak yuz
Peshonasi iyagiga nisbatan keng ayollarga assimetrik tarzda kiyiladigan beretlar juda yarashadi. Shuningdek, o‘ta katta bo‘lmagan zich to‘qilgan shapkalar hamda quloqchali bosh kiyimlar ham tavsiya etiladi. Bunday vaziyatda keng peshona va kichkina jag‘ga mos keluvchi bosh kiyimi tanlashni unutmaslik kerak. Shuning uchun ham uchburchak yuz shakli uchun shapka tanlash biroz nozik masala. Sabab har qanday bosh kiyimi peshona qismni yanada katta ko‘rsatishi mumkin. Zich to‘qilgan keng bosh kiyimlaridan esa voz kechgan ma’qul.
To‘rtburchak yuz
Ko‘pincha ushbu shakldagi yuzlarning yanoq suyagi ko‘zga tashlanadi. Ularni yashirish uchun peshona qismini biroz ochiq qoldiradigan, orqa tomonga tushiriladigan trikotaj shapkalar mos keladi. Quloqlarga tushib turuvchi shlayapalar ham yuzni yanada ixcham ko‘rsatadi. Quloqlari orqaga bog‘lanadigan mo‘ynali shapkalar to‘rtburchak yuzli xonimlar uchun ayni muddao. Keng bosh kiyimlari va peshona butunlay to‘sib turuvchi shapkalar to‘rtburchak yuzli ayollarga tavsiya etilmaydi.
- Bosh kiyimlarni tanlashda nafaqat ustki kiyim yoki yuz shakli, balki butun boshli qomat ham inobatga olinishi zarur.
- Keng aylanali shlyapalar balandligi o‘rtachadan kam bo‘lmagan qizlar uchun mos keladi.
- Baland bo‘yli to‘lishgan qizlar uchun tor va ixcham shlyapalar mos keladi.
- Ozg‘in va uzun bo‘yli ayollarda har qanday shakldagi keng bosh kiyimlar chiroyli ko‘rinadi.
- Bo‘yi past xonimlar esa keng va katta shapkalardan uzoqroq bo‘lgani ma’qul.
Izoh (0)