Oliy va o‘rta maxsus ta’lim vazirligi matbuot xizmati rahbari Farhod Babashevning ma’lum qilishicha, OTMlarda an’anaviy ta’limga qaytilganiga bir oy bo‘lishiga qaramay talabalar orasida koronavirus bilan kasallanganlar aniqlanmagan. Bu haqda “Kun.uz” xabar qilmoqda.
“Har bir OTMda koronavirusga gumon qilingan va koronavirusga chalinganlarni joylashtirish uchun maxsus izolyatorlar tashkil qilingan. Hozir izolyatorlarning barchasi bo‘sh. Lekin onlayn o‘qiyotgan talabalar orasida kasallanganlar va uyida davolanayotganlar bo‘lishi mumkin. Biroq bu bo‘yicha statistika yo‘q”, – deydi Farhod Babashev.
Bundan tashqari vazirlik matbuot kotibi OTMlarning koronavirusdan profilaktika maqsadida dori va vitaminlar sotib olishi lozimligi to‘g‘risidagi qarorga ham izoh berdi.
“Haqiqatan ham OTM xodimlari va talabalarini koronavirus infeksiyasidan himoya qilishga oid qo‘shma qaror imzolandi. Qarorda ko‘rsatilgan dori-darmonlar OTMga biriktirilgan tibbiyot muassasalari tavsiyasi asosida xarid qilinadi hamda talabalar va o‘qituvchilarga tarqatiladi. Lekin hech qaysi OTM shifokor tavsiyasisiz dori sotib olmaydi.
OTMlarga shifokorlar tavsiya asosida dori va vitaminlar sotib olish, agar ortiqcha xarid qilinsa, saqlash muddati talablariga amal qilgan holda zaxira shakllantirish bo‘yicha xat yuborilgan”, – deya ma’lumot berdi vazirlik rasmiysi.
Qarorga ko‘ra, talabalar va xodimlarga koronavirus profilaktikasi uchun gidroksixloroxin va sink preparatlari tarqatilishi, koronavirus infeksiyasi bilan kasallangan va unga gumon qilinganlarga esa vitamin D, vitamin C, parasetamol, atsetilsalitsil kabi vitamin va dorilar berilishi qayd etilgan. Dorilar xaridi OTMlarning budjetdan tashqari mablag‘lari hisobidan amalga oshiriladi.
Avvalroq O‘zbekistonda talabalar 28-dekabrdan qishki ta’tilga chiqishi haqida xabar berilgandi.
Izoh (0)