AQSh Moliya vazirligi Shveysariya va Vyetnamni “valyuta manipulyatorlari” deb tan oldi. Bu haqda vazirlik tomonidan e’lon qilingan AQShning asosiy savdo hamkorlari makroiqtisodiy va valyuta siyosati to‘g‘risidagi hisobotda qayd etilgan, deb yozmoqda “RBK”.
AQSh u yoki bu davlatni “valyuta manipulyatori” deb tan olishi mumkin. Buning uchun mazkur mamlakat uchta mezonga mos kelishi kerak — uning AQSh bilan savdo profitsiti 20 milliard dollardan oshishi, tashqi savdo balansining umumiy ijobiy saldosi YaIMning 2 foizidan baland bo‘lishi, Markaziy bankning valyuta intervensiyalari YaIMning 2 foizidan oshishi.
Shveysariya va Vyetnam barcha uchta mezonga mos keladi. 2020-yilning iyun oyigacha to‘rt chorak davomida Shveysariya tashqi savdo balansining umumiy profitsiti YaIMning 8,8 foizni tashkil qilgan, AQSh bilan savdo profitsiti esa 49 milliard dollarga yetgan. 2019-yilning iyul oyidan 2020-yilning iyun oyigacha Shveysariya milliy banki tomonidan xarid qilingan valyutaning sof qiymati 103 milliard dollarni tashkil etgan.
AQSh yana bir nechta davlatni manipulyator sifatida tan olmagan, biroq ularni kuzatuv ro‘yxatiga kiritgan. Ular Tailand, Tayvan va Hindiston bo‘lib, ular allaqachon ro‘yxatda bo‘lgan Xitoy, Yaponiya, Janubiy Koreya, Germaniya, Italiya, Singapur va Malayziya qatoriga qo‘shilgan.
AQSh shu paytga qadar faqat uchta mamlakatni “valyuta manipulyatori” sifatida tan olgan — turli yillarda ro‘yxatga Xitoy, Yaponiya va Tayvan kiritilgan. BBH investitsion banki mutaxassisi Vin Tinning ma’lum qilishicha, “valyuta manipulyatorlari” ro‘yxatiga kiritilishning ma’nosi shundaki, yakunda mamlakat sanksiya ostiga tushishi mumkin. Bu sanksiyalar esa AQSh savdo hamkorlarining moliyaviy sohasi rahbariyatiga ular o‘z valyutasini kuchli qadrsizlantirmasligi uchun ma’lum bosim o‘tkazadi.
Izoh (0)