Namangan shahrida 16-dekabr kuni yuz bergan yo‘l-transport hodisasi oqibatida olti kishi Nexia avtomobilida yonib ketdi va halok bo‘ldi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, 16-dekabr kuni soat 16:30 da Namangan shahridagi Islom Karimov va Istiqlol ko‘chalari kesishgan “Fazo” chorrahasida MAN yuk mashinasi va Nexia ishtirokida YTH sodir bo‘ldi. 1974-yilda tug‘ilgan haydovchi A.A. MAN rusumli yuk avtomashinasida harakatlanayotib, chorrahadan o‘tayotgan 1978-yilda tug‘ilgan haydovchi N.M. boshqaruvidagi Nexia avtomobili bilan to‘qnashgan.
To‘qnashuv natijasida yong‘in sodir bo‘lib, Nexia’ning salonida bo‘lgan 42 yoshli haydovchi, haydovchining 39 yoshli rafiqasi M.X., haydovchining 13 yoshli va 10 yoshli farzandlari M.B. va A.B., 34 yoshli yo‘lovchi G.Sh. va 7 yoshli yo‘lovchi M.Sh. hodisa joyida yonib ketib vafot etgan.
Mazkur YTH yuzasidan Namangan viloyati IIB Tergov bo‘limi tomonidan Jinoyat kodeksining 266-moddasi 3-qismi “a” bandi (odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)