Italiyada 2020-yilning yakuni bo‘yicha Ikkinchi jahon urushidan buyon qayd etilgan eng yuqori o‘lim darajasi ro‘yxatga olinishi mumkin. Bu haqda Italiya Milliy statistika instituti rahbari Jan Karlo Blanjardo ma’lum qildi, deb yozmoqda “RBK”.
“2020-yil hali yakunlanmadi, biroq hisob-kitoblar shuni ko‘rsatmoqdaki, bizda bu yil 700 mingtadan ortiq o‘lim qayd etiladi. So‘nggi marta bunday holat 1944-yilda, Ikkinchi jahon urushi avjiga chiqqan vaqtda kuzatilgan”, — deya ma’lum qilgan institut rahbari.
Blanjardoning aniqlik kiritishicha, bunday o‘sish koronavirus infeksiyasi ta’siri bilan bog‘liq. Uning so‘zlariga ko‘ra, 2019-yilda Italiyada 647 ming kishi vafot etgan.
Avvalroq Italiya Milliy statistika instituti mamlakatdagi demografik vaziyat haqidagi hisobotni e’lon qilgan. Hisobotga ko‘ra, 2019-yilning oxirida Italiyada 59,6 million kishi yashagan. Bu 2018-yilning 31-yanvariga nisbatan taxminan 175 ming kishiga kamroq. Aholining o‘rtacha yoshi 43 dan 45 ga ko‘tarilgan. Italiyada yashovchi xorijliklar soni esa 43 ming kishiga ortib, umumiy hisobda 5 million kishidan oshgan.
Italiya Sog‘liqni saqlash vazirligi ma’lumotlariga ko‘ra, 15-dekabr holatiga ko‘ra mamlakatda 1,855 million kishida koronavirus aniqlangan, 65 ming bemor kasallik qurboniga aylangan.
Izoh (0)