Toyota’ning Britaniyadagi ofisi hayotini xavf ostiga qo‘yib koronavirusga qarshi kurashayotgan turli soha xodimlariga bag‘ishlab GR Yaris modelining alohida “qaynoq” versiyasini taqdim etdi. Xetchbek yorqin ranglarga ega bo‘lgan va uning old qismiga tibbiy niqob chizilgan, deb xabar beradi Motor.
GR Yaris’ni bo‘yash ishlari bilan Design a Rally Car Livery (“Poyga avtomobili uchun ranglar jamlanmasini o‘ylab top”) tanlovi g‘olibi 16 yoshli Elis Gudliff shug‘ullangan. “Virusga qarshi” Yaris Monsedagi WRC rallisining final bosqichida taqdim etilgan.
Koronavirus pandemiya davrida ko‘zga tashlanadigan eng yorqin atribut — bu tibbiy niqob — avtomobilning old qismiga chizilgan, uning rezinalari esa yon oynalarga tortilgan. Tom va quyruq qismi yorqin kamalaksimon ranglar jamlanmasiga ega bo‘lgan — “keng qamrovli dunyo” va tinchlik ramzi. Yon tomonlarida hamshira, o‘qituvchi, sotuvchi va politsiyachining profili tushirilgan. Rassomning fikricha, ushbu soha vakillari mehnatining qadri ayniqsa pandemiya vaqtida ortgan.
Maktab o‘quvchisi bo‘lgan Gudliff 2020-yilgi Uels rallisi bekor qilinganidan “mutlaqo hayratga” tushganini so‘zlab bergan. Aynan shu sababli o‘smir qiz xetchbekning yon tomoniga narsissning (nargiz guli) tasvirini tushirgan — u Uelsning rasmiy ramzlaridan biri hisoblanadi.
Uels rallisini hisob bo‘yicha 76-marotaba 29-oktabrdan 1-noyabrga qadar o‘tkazish rejalashtirilgan edi. Biroq koronavirus sabab poyga bekor qilingan. So‘nggi bor tashkilotchilar 1967-yilda bu kabi qarorni qabul qilgan — o‘shanda Uelsda oqsim kasalligi tarqalgan edi.
Izoh (0)