Ummonning Maskat shahrida Osiyo Olimpiya kengashining bosh assambleyasi bo‘lib o‘tmoqda.
16-dekabr kungi yig‘ilishda 2030 va 2034-yillarda bo‘lib o‘tadigan Osiyo o‘yinlariga mezbonlik qiladigan mamlakat nomi ma’lum bo‘ldi.
Unga ko‘ra, 2030-yilgi Osiyo o‘yinlariga Qatarning Doha shahri mezbonlik qiladi. Mezbonlik uchun kurashda yengilgan Ar-Riyod shahriga (Saudiya Arabistoni) esa 2034-yilgi Osiyo o‘yinlari mezbonligi topshirilgan.
Doha bunga qadar 2006-yilgi Osiyo o‘yinlariga mezbonlik qilgan, biroq Saudiya Arabistoni uchun bu yangilik hisoblanadi.
Ma’lumot uchun, so‘nggi Osiyo o‘yinlari 2018-yilda Indoneziyaning Jakarta va Palembang shaharlarida o‘tkazilgan. 2022-yilgi o‘yinlarga Xitoyning Xanchjou shahri mezbonlik qilsa, 2026-yilgi musobaqa Yaponiyaning Nagoya shahrida bo‘lib o‘tadi.
Eslatib o‘tamiz, O‘zbekistoning Toshkent va Samarqand shaharlari 2030-yilgi Osiyo o‘yinlari mezbonligi uchun da’vogarlik qilishi aytilgandi.
Xususan, 2018-yilning dekabr oyida Prezident Shavkat Mirziyoyev parlamentga murojaatida O‘zbekiston kelajakda Osiyo o‘yinlari musobaqalaridan biriga mezbonlik qilishi kerakligi va bu borada istiqbolli rejalar ishlab chiqilishi lozimligi haqida aytgandi.
2019-yilning fevral oyida Osiyo Olimpiya Kengashi prezidenti Shayx Ahmad al-Fahad as-Saboh Toshkentga tashrif buyuradi. As-Saboh va Milliy Olimpiya qo‘mitasining o‘sha vaqtdagi prezidenti Umid Ahmadjonov ikki kun davomida Osiyo o‘yinlariga mezbonlik qilish imkoniyatlarini muhokama qilgandi. O‘sha paytda Ahmadjonov Milliy olimpiya qo‘mitasi rahbariyati tomonidan 2030-yilgi Osiyo o‘yinlarini Toshkent va Samarqandda o‘tkazish bo‘yicha ariza Osiyo Olimpiya Kengashiga taqdim etilgani haqida ma’lum qilgandi.
2019-yilning may oyida esa O‘zbekistonda yozgi Osiyo o‘yinlarini tashkil etish to‘g‘risida hukumat qarori e’lon qiligandi. Unda O‘zbekiston 2030-yilgi Osiyo o‘yinlari musobaqasi mezbonligiga da’vogar bo‘lishi imkoniyati mavjudligi ta’kidlanib, o‘yinlarni o‘tkazish uchun munosib infrastrukturani yaratish chora-tadbrilarini ishlab chiqish belgilangandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)