Britaniyalik mashhur yozuvchi, 20 dan ortiq josuslik romani muallifi Jon le Karre vafot etdi

Asl ismi Devid Kornuell bo‘lgan britaniyalik yozuvchi Jon le Karre 90 yoshida vafot etdi. Bu haqda Meduza xabar bermoqda.

Yozuvchining o‘limiga COVID-19 bilan bog‘liq bo‘lmagan qisqa muddatli kasallik sabab bo‘lgan. Oila a’zolari tomonidan esa uning pnevmoniya bilan kasallanganiga aniqlik kiritilgan.

Jon le Karre dunyoning 36 tiliga tarjima qilingan yigirmadan ortiq josuslik romanlarining muallifi. Kornuell 1931-yilda Dorset grafligidagi Pul shahrida tug‘ilgan. U Bern va Oksford universitetlarida tahsil olgan. 1950-yillarning oxirlarida esa Britaniyaning MI-5 va MI-6 razvedka xizmatlari bilan hamkorlik qilgan.

Ma’lumot uchun, 1961-yilda yozuvchining “O‘liklarga qo‘ng‘iroq” deb nomlangan ilk romani nashr etilgan. Uning asarlari orasida “Sovuqdan kelgan josus” (1963), “Ayg‘oqchi, tashqariga chiq” (1974) “Kichkina barabanchi” (1983), “Xuddi biz kabi xoin” (2010) kabilari mashhurlikka erishgan. Yozuvchining “Dala agenti” nomli so‘nggi kitobi 2019-yil oktabr oyida nashr etilgan. Shuningdek, uning romanlari asosida ko‘plab film va seriallar ham suratga olingan.