Sof mahsulotdan tayyorlangan sharbatlarning afzalligi barchaga ma’lum. Bu organizmning yaxshi ishlashi uchun zarur bo‘lgan energiya, vitamin va minerallarning manbayi hisoblanadi. Ular ichak mikroflorasini yaxshilash, modda almashinuvi jarayonini tezlashtirish va immunitetni mustahkamlash uchun juda foydali. Quyida mavsumiy meva va sabzavotlardan tayyorlanadigan 5 ta foydali sharbat retsepti bilan tanishish mumkin.
Zanjabil va sitrus
Zanjabil va sitrus C vitaminining ajoyib manbayi bo‘lib, vazn yo‘qotishda juda katta yordam beradi. Bir choy qoshiq maydalangan zanjabil ildizi, ikkita tozalangan apelsin, greypfrut va yarimta limonning barchasi sharbat chiqargichga solinadi. Olingan sharbat suv bilan suyultiriladi. Shunda uning konsentratsiyasi kamroq bo‘ladi, bu esa tana uchun foydalidir.
Lavlagi
Lavlagi sharbati eng foydali ichimliklardan biri hisoblanadi. U jigar, buyrak, o‘t va siydik pufagi, limfa tugunlari bilan bog‘liq kasalliklarni davolash va oldini olish uchun ishlatiladi. Shuningdek, immunitet tizimini ham yaxshilaydi. Ayniqsa, teri holatiga ijobiy ta’sir etishi bilan juda foydali. Lavlagi sharbati insonning holati va rangini tetiklashtirishi uchun xom lavlagi, sabzi va olmaning birgalikda sharbati olinadi va yalpiz qo‘shib, iste’mol qilinadi.
Sabzi
Sabzi tarkibida terining yangilanishi jarayonida ishtirok etadigan va organizmning sog‘lom ishlashi uchun zarur bo‘lgan B, C va E vitaminlari mavjud. Sabzi sharbati uchun 3—4 sabzi va bitta tozalangan apelsin sharbat chiqargichga solinadi va tayyor bo‘lganidan so‘ng bir necha tomchi zaytun yog‘i qo‘shiladi.
Oshko‘k (selderey)
Oshko‘k sharbati Gollivud aktrisalari va taniqli modellarining eng sevimli ichimligiga aylandi. Ko‘pchilik o‘ylaganidek mo‘jiza bo‘lmasa-da, oshko‘k sharbati tanadagi toksinlarni chiqarib tashlaydi, terini yoshartiradi va qarish jarayonini sekinlashtiradi. Buning uchun ikkita oshko‘k dastasi, bitta olma, ikki osh qoshiq limon sharbati va 1 choy qoshiq zanjabil ildizi bilan birlashtirilib, sharbat chiqargichga solinadi. Hosil bo‘lgan sharbat ham salomatlik, ham teri parvarishi uchun iste’mol qilinadi.
Karam
Karam sharbati eng noodatiy retsept bo‘lib, foydasi ham o‘ziga yarasha, albatta. Unga ko‘ra, karam, olma va sabzi sharbat chiqargichdan o‘tkaziladi va suv bilan suyultirilib, asal qo‘shiladi. Yod, magniy, fosfor, kalsiy, natriy, azot va boshqa mineral moddalar va organizmdagi yallig‘lanishni bartaraf etadigan vitaminlarga boy ushbu sharbatni bemalol qish kunlarida iste’mol qilish mumkin.
Izoh (0)