Adliya vazirligi “Aholi va tadbirkorlarga yengilliklar yaratish hamda byurokratik to‘siqlarni tubdan qisqartirish chora-tadbirlari to‘g‘risida”gi Prezident farmoni loyihasini muhokamaga qo‘ydi.
Farmon loyihasiga ko‘ra, 2021-yil 1-apreldan boshlab davlat va xo‘jalik boshqaruv organlari, davlat muassasalari va mahalliy davlat hokimiyati organlari tomonidan jismoniy shaxslardan:
a) quyidagi faktlarni tasdiqlovchi:
- ruhiy kasalliklar bo‘yicha dispanser hisobida turishi yoki turmasligi;
- narkologiya bo‘yicha dispanser hisobida turishi yoki turmasligi;
- sudlanganlik;
- manzil-ma’lumot axboroti;
- fuqaroning nomida shaxsiy uy-joy borligi yoki yo‘qligi;
- turar joyning maydoni;
- soliq qarzi bor yoki yo‘qligi;
- soliq to‘lovchi jismoniy shaxslarni davlat soliq xizmati organlarida hisobga qo‘yilganligi;
- pensiya va nafaqa miqdori;
- pensiya va nafaqa oluvchilar ro‘yxatida mavjud yoki mavjud emasligi;
- nikoh qayd etilganligi, nikohda turmasligi yoki nikohdan ajralganligi to‘g‘risidagi;
- shaxsni tasdiqlovchi hujjatning nusxasi;
- shaxsning belgilangan shakldagi fotosurati;
- tibbiy-ijtimoiy ekspert komissiyalarining ma’lumotnomalari;
- kadastr hujjatlari va ularning nusxalari;
- mehnat daftarchalari va ularning nusxalari;
- ish haqi va ish stajini, oliy va o‘rta maxsus ta’lim muassasasida o‘qiganlikni tasdiqlovchi arxiv ma’lumotnomalarini talab qilish bekor qilinadi.
Ko‘rsatilgan hujjat yoki ma’lumotlarning davlat va xo‘jalik boshqaruv organlari, davlat muassasalari va mahalliy davlat hokimiyati organlari tomonidan jismoniy shaxslardan talab qilinishi davlat xizmatlari ko‘rsatish sohasidagi qonun hujjatlarini buzish deb hisoblanadi.
Avvalroq Adliya vazirligi fuqarolardan ortiqcha hujjat talab qilgan o‘nga yaqin OTMni jazolagani to‘g‘risida xabar berilgandi.
Mavzuga doir: O‘zbekistonliklar so‘nggi bir oyda DXMdan ko‘proq qanday ma’lumotnomalar so‘rab murojaat qilgani ma’lum qilindi