Belarus prezidenti Aleksandr Lukashenko 2016-yilda Armaniston prezidenti Serj Sargsyanga Tog‘li Qorabog‘ning bir qismini besh milliard dollar evaziga Ozarbayjonga berish haqida maslahat bergan. Sargsyanning ofisi ikki davlat rahbari o‘rtasidagi suhbat yozilgan audioyozuvning haqiqiyligini tasdiqlagan. Bu haqda Sputnik xabar berdi.
Audioyozuvda Lukashenko raqibning urush boshlash xavfidan qo‘rqib, yettita tumanni (“xavfsizlik belbog‘i”) Ozarbayjonga berishni istamayotgan Sargsyanning pozitsiyasini “kuchsiz” deb atagan. Belarus yetakchisi jangovar harakatlarning oldini olish uchun Tog‘li Qorabog‘ga ODKB tinchlikparvarlarini jo‘natishni taklif qilgan.
Sargsyan nima uchun hududlarni “shunchaki” berib yuborishi kerakligini so‘ragan. “Nega shunchaki bo‘larkan? U to‘laydi. U senga birinchi bosqichda 5 milliard dollar taklif qilgan”, — deya ta’kidlagan Lukashenko. Bunda u Ozarbayjon prezidenti Ilhom Aliyevni nazarda tutgan.
Sargsyan esa Boku o‘z da’volaridan voz kechishi uchun olti milliard dollar berishini aytgan. “Nimadan? Yettita tumandanmi? Sen nima deyapsan?”, — deya hayratlangan Lukashenko. U suhbatdoshi muammoni hal qilishni istamayotganini aytib ta’na qilgan.
Shuningdek, Sargsyan yettita tumanni bera olmasligini, chunki ular uchun besh ming kishi halok bo‘lganini aytgan. “Nima qilibdi? Bizda (Ikkinchi jahon urushida) 30 million kishi halok bo‘lgan. Nima, biz hozir nemislar bilan jang qilyapmizmi?”, — degan Lukashenko.
Sargsyanning ofisi tomonidan ma’lum qilinishicha, audioyozuvning e’lon qilinishi fakt sifatida qabul qilinadi, biroq bu vaziyatga izoh berilmagan.
Izoh (0)