Saloh, Neymar, Mbappe va “o‘zga sayyoraliklar”ning “samoviy” boyliklari. Dunyoning eng yaxshi futbolchilari qancha daromad ko‘radi?

Futbolchilarning asosiy daromad manbayi, albatta, ularning sport shartnomalaridir. Bundan tashqari charm to‘p ustalarining mashhurligi ularning reklama shartnomalaridagi ishtirokini ham ta’minlaydi. O‘z navbatida bu ularni dunyoning eng boy odamlari qatoriga qo‘shadi. Quyida 2020-yilda (Forbes ma’lumotlariga ko‘ra) eng ko‘p daromad topgan futbolchilar haqida hikoya qilamiz.

David de Xea (“Manchester Yunayted”, 27 million dollar)

2011-yildan beri “Manchester Yunayted” sharafini himoya qilib kelayotgan Ispaniya terma jamoasi posbonining 2020-yildagi daromadi 27 million dollarni tashkil qildi. Shuning 23 millioni uning bir yillik maoshiga to‘g‘ri keladi. Bundan tashqari u turli bonuslar va reklama shartnomalaridan ham qo‘shimcha daromad ko‘radi.

Robert Levandovski (“Bavariya”, 28 million dollar)

“Bavariya” va Polsha terma jamoasining yetakchisi Levandovski ham ancha faol bo‘lib, Myunxen klubidagi maoshidan tashqari qator reklamalarida ishtirok etadi. Shuningdek, Levandovski ko‘plab jahon brendlarining yuzi hisoblanadi.

Uelslik futbolchining yillik daromadi 29 million dollarga teng bo‘ldi. Transfer huquqi “Real”ga tegishli bo‘lgan “Tottenhem” vingeri Nissan va Adidas kompaniyalari bilan shartnomalarga ega. Bu esa uni dunyoning eng boy futbolchilari qatoriga qo‘shadi.

Antuan Grizmann (“Barselona”, 33 million dollar)

“Atletiko” safidagi yorqin o‘yinlaridan keyin “Barselona”ga yo‘l olgan Grizmanning katalon klubidagi o‘rtacha (imzolangan shartnomaga ko‘ra, Grizmann “Barselona”dagi dastlabki ikki mavsumida 18 million, keyingilarida esa 21, 23, 25 million dollar maosh oladi) 21 million dollarni tashkil qiladi. Bonus va reklama shartnomalari esa uning yillik daromadini sezilarli darajada oshiradi.

Pol Pogba (“Manchester Yunayted” 34 million dollar)

“Manchester Yunayted” safida kutilgan o‘yinni namoyish eta olmayotgan Pogba o‘ziga xos soch turmaklarini qilish uchun yetarli (ortiqcha) mablag‘ga ega. Uning yillik daromadi naq 34 million “ko‘kat”ni tashkil qiladi.

Muhammad Saloh (“Liverpul”, 37 million dollar)

“Liverpul” yulduzi Muhammadning 2020-yildagi daromadi 37 million dollarga yetdi. Albatta, buning katta qismi reklama shartnomalari, bonus va fotosessiyalarga to‘g‘ri keladi.

Mbappening PSJdagi bir yillik maoshi 22 million dollarni tashkil qiladi. Shuningdek, u ko‘plab dunyoga mashhur brendlarning reklamalarida faol qatnashishni umuman kanda qilmaydi. Bunga uning Nike va Hublot soatlarini ishlab chiqaradigan kompaniyalar bilan tuzgan shartnomalari yaqqol misol bo‘la oladi.

Yuqoridagi futbolchilarning daromadi bilan taqqoslaganda, bu yerda farq juda katta. Braziliyalikning PSJdagi maoshiga (yiliga 39 million dollar) istalgan futbolchi faqat havas qilishi mumkin. Bundan tashqari, u hech qaysi reklama beruvchining taklifini rad etmaydi. Shu tariqa uning 2020-yildagi daromadi 96 million dollarga yetdi.

2016 va 2017-yillarda Forbes Krishtianu Ronalduni dunyodagi eng ko‘p maosh oluvchi futbolchi deb topgandi. To‘g‘ri, hozir u pozitsiyasini biroz “boy berdi”. Ammo Krish pul yetishmasligi haqida umuman o‘ylamasa ham bo‘ladi. Chunki futbolchilar orasidagi ilk milliarder va Instagram’ning eng mashhur odami “Yuventus”dagi maoshidan tashqari, dunyoning eng mashhur brendlari bilan shartnomalar va ko‘plab o‘z bizneslariga ega.

“Barselona”dagi maosh va, albatta, reklama shartnomalari hamda bizneslar Lionel Messiga azaliy raqibi Krishtianudan ustun kelishiga imkon berdi. Leoning yillik daromadi 126 million dollarni tashkil qildi. Bu esa uni dunyoning eng ko‘p daromad topadigan futbolchiga aylantirdi.