O‘zbekistonda elektr ta’minotidagi uzilishlar oldini olish va barcha iste’molchilar ehtiyojini bir maromda qondirish maqsadida ma’lum me’yordan ortiqcha ishlatilgan elektr energiyasi uchun ustama qiymat belgilanishi mumkin. Bu haqda energetika vaziri o‘rinbosari Sherzod Xo‘jayev ma’lum qildi.
Xo‘jayevning qayd etishicha, O‘zbekistonda 1990-yillarda umumiy elektr energiyasi iste’molida aholining ulushi 9,5 foizini tashkil qilgan bo‘lsa, hozirgi vaqtda bu ko‘rsatkich 25 foizga yetgan. Ayni vaqtda, aholi iste’moli darajasi kun davomida tonggi va kechki vaqtlarda, yozdagi jazirama va qishdagi qahratonlar vaqtida sezilardi o‘zgarib turadi.
Uning ta’kidlashicha, “elektrni chegaralab qo‘yish, ishlatmagin deyish noto‘g‘ri”, ammo “undovchi mexanizmlar”dan foydalanish kerak. Masalan, me’yordan ortiqcha foydalanganlik uchun qo‘shimcha narx belgilansa, elektr energiyasi isrofgarchgiligining oldini olish, ayni vaqtda, uzilish bo‘layotgan hududga ko‘proq elektr yetkazib berilishiga erishish mumkin.
“Biz bu qarorga kelishda xalqaro ekspertlarni jalb qilib, o‘rganishlar olib bordik. Bu tizimni joriy qilishda juda ehtiyotkorona yondashishimiz kerak. Chunki iste’molchi elektr tokini chindan ham zarurligi uchun ishlatayaptimi yoki xonadonining to‘rtta xonasida ham konditsionerni yoqib qo‘yib isrof qilyaptimi, buni bilmaymiz. Albatta, puxta o‘ylangan, keng qamrovli qaror qabul qilamiz”, — dedi u.
Eslatib o‘tamiz, 2019-yilning yanvar oyida Toshkent shahrining Yunusobod tumanida tajriba tariqasida elektr energiyasi iste’moli bo‘yicha bazaviy me’yorlar joriy qilingan edi. Unga ko‘ra, bir abonent uchun oylik iste’mol miqdori 300 kilovatt soat etib belgilangan, bu me’yordan ortiq iste’mol qilingan energiya hajmi uchun to‘lov hisoblashda 1,2 baravar miqdoridagi oshirilgan koeffitsiyent qo‘llanilishi belgilangan edi. Ushbu tajriba 2020-yilda koronavirus pandemiyasi sababli bekor qilingan.
Izoh (0)