Jizzax viloyati 2020-yilgi paxta yig‘im-terimi mavsumida majburiy mehnatga jalb etish bilan bog‘liq holatlar bo‘yicha Namangan viloyatidan so‘ng ikkinchi bo‘ldi. Odam savdosiga va majburiy mehnatga qarshi kurashish Milliy komissiyasining 4-dekabr kuni bo‘lib o‘tgan yig‘ilishida ma’lum qilinishicha, viloyatda 7 ta mehnatga yo‘l qo‘yish holati qayd etilgan.
Qayd etilishicha, viloyatda paxta kampaniyasi davomida “Hududgaz”, “Hududiy elektr tarmoqlari” va “Jizzax neft-baza” kabi bir qancha tashkilot xodimlari majburiy mehnatga jalb qilingan. “Daryo” muxbiri Bekjon Jo‘raqulovning xabar berishicha, Milliy komissiya yig‘ilishida “bu tashkilotlarning paxtaga nima aloqasi bor?”, degan savol qo‘yilgan.
“Afsuski, bizda ham shunday salbiy holatlar aniqlandi. Bu bo‘yicha mansabdorlarga tegishli tartibda jazo choralari qo‘llanilgan. Keyingi davrda bunday vaziyatlar bo‘lmasligiga harakat qilamiz va sizning ishonchingizni oqlaymiz, degan umiddaman”, — deya vaziyatga izoh bergan yig‘ilishda so‘zga chiqqan Jizzax viloyati hokimi Ergash Soliyev.
Milliy komissiya raisi, senator Tanzila Norboyevaning afsus bilan ta’kidlashicha, bunday holatlar xalqaro maydonda O‘zbekiston imijiga salbiy ta’sir ko‘rsatmoqda. “Ayniqsa, mamlakatda majburiy mehnatning oldini olish va qishloq xo‘jaligida amalga oshirilayotgan islohotlarga shubha bilan qarashga sabab bo‘lmoqda”, — dedi u.
Avvalroq Namangan viloyatida majburiy mehnatga yo‘l qo‘ygani uchun Pop tumani hokimi jarimaga tortilgani, Chortoq va Uchqo‘rg‘on tumanlari hokimlariga hayfsan berilgani haqida xabar berilgan edi. Senat raisi Tanzila Norboyevaning ta’kidlashicha, Namanganda majburiy mehnat bo‘yicha 2013-yildan beri “gard” ham chiqmagan edi.
Izoh (0)