Suares topib bergan uy, “Liverpul” muxlislari pachoq qilgan mashina va millionlab daromad. Filippe Koutinyo qanday hayot kechiradi?

“Liverpul” safidagi bir necha muvaffaqiyatli mavsumlardan keyin “Barselona”ga yo‘l olgan Filippe Koutinyo dastlab Kataloniyada omadsizlikka uchradi va bir mavsum “Bavariya”da ijarada o‘ynab keldi. 2020/21-yilgi mavsumdan boshlab esa u nisbatan barqaror o‘yin ko‘rsatmoqda va sekin-astalik bilan jamoada o‘z o‘rniga ega bo‘lib bormoqda. Biroq bugun Koutinyoning faoliyati va o‘yin uslubi haqida emas, balki yashash tarzi, oilasi, daromadi va do‘stlari haqida fikr yuritamiz.

Koutinyo qayerda yashaydi?

Koutinyo 2018-yilda “Barselona”ga o‘tganida o‘zi uchun turar joy qidirishi shart emas edi. Unga hozirda “Atletiko” sharafini himoya qilayotgan “Liverpul”dagi sobiq jamoadoshi Luis Suares Kataloniyaning Kasteldefelsdan uy topib qo‘ygandi. Uydan “Barsa” bazasi va stadiongacha yetib olish uchun, taxminan, yarim soat vaqt ketadi. Qo‘shnilar orasida esa Messi, Suares singari taniqli futbolchilar bor edi.

Koutinyo yashayotgan hashamatli qasrning narxi, taxminan 5–6 million yevroni tashkil qiladi. Imorat shaharning eng obro‘li hududida joylashgan bo‘lib, u 750 kvadrat metr joyni egallagan. To‘rt qavatli hashamatli uyda sport zali, ulkan xonalar va oshxona, shuningdek, kichik sharob ombori, hatto lift ham mavjud. Uyning tashqi qismi, ya’ni hovlida hovuz, tekbol maydon (oyoqda o‘ynaladigan stol tennisi) va go‘zal bog‘ mavjud.

Koutinyoning mashinalari

Koutinyo avtomobillarining aniq soni haqida ma’lumot yo‘q. Biroq braziliyalikning mashinalar to‘plami uning darajasidagi futbolchi uchun juda kamtar ekanligi ma’lum. Yarim himoyachining eng qimmat mashinasi Aston Martin B8 Vantage bo‘lib, uning qiymati 150 ming dollarga baholanadi.

Shuningdek, braziliyalik futbolchida Range Rover, Audi Q7 kabi avtomobillarni ko‘rish mumkin.

Bundan tashqari unda Porsche Macan rusumli mashinasi bor edi, ushbu avtoulovni “Liverpul” muxlislari yarim himoyachining “Barselona”ga o‘tish istagi borligi haqida xabar topgach toshbo‘ron qiladi.

Koutinyoning shaxsiy hayoti

Koutinyo o‘z qasrida rafiqasi Ayne bilan yashaydi. Futbolchi bo‘lajak rafiqasi bilan 14 yoshida tanishgan. O‘spirin ziyofatlarning birida qizni bir ko‘rishda yoqtirib qoladi. Uzoq yillik muhabbatdan so‘ng juftlik 2012-yilda turmush qurishga qaror qiladi.

Baxtli oila hozirda Mariya va Esmeralda ismli qizaloqlarni voyaga yetkazmoqda. Filippe sodiq turmush o‘rtoq va g‘amxo‘r ota bo‘lib, imkon qadar oilasi bilan ko‘proq vaqt o‘tkazishga harakat qiladi. O‘z navbatida Ayne ham farzandlari bilan birga o‘yinlarga kelib, Koutinyoni qo‘llab-quvvatlab turishni kanda qilmaydi.

Koutinyoning daromadi qancha?

Koutinyoning “Barselona”dagi bir yillik maoshi, taxminan, 13,5 million yevroni tashkil qiladi.

Bundan tashqari, uning Nike kompaniyasi bilan shartnomasi mavjud. U bu orqali yiliga 2 million yevroni qo‘lga kiritadi. Shuningdek, futbolchi muntazam bo‘lmasa-da, turli xil reklamalarda suratga tushish orqali ham yaxshigina daromad ko‘radi.

Koutinyoning do‘stlari kim?

Koutinyo har doim maydon va uning tashqarisida o‘zining kamtarligi va namunali xulqi bilan ajralib turgan. Yuqorida ta’kidlanganidek, u ko‘p vaqtini oilasi bilan o‘tkazadi. Biroq shunga qaramay, braziliyalik futbol olamida ham bir qancha do‘st orttirishga muvaffaq bo‘lgan.

Uning eng yaqin do‘stlaridan biri Luis Suares bo‘lib, aynan uning Koutinyoga uy topib bergani ham bejiz emas.

Shuningdek, u “Liverpul”da to‘p surgan mahal Muhammad Saloh bilan iliq munosabatlarga ega bo‘lgan. Ular bugungi kunda ham qo‘ng‘iroqlashib turadi.

Koutinyoning yana bir do‘sti Neymar bo‘lib, ular birgalikda Braziliyaning turli yosh toifalaridagi terma jamoalari sharafini himoya qilgan.