Prezident Shavkat Mirziyoyev 4-dekabr, juma kuni poytaxtning Yangihayot tumanida barpo etilgan Toshkent metallurgiya zavodining ochilish marosimida ishtirok etadi. Bu haqda Prezident matbuot xizmati xabar berdi.
“Ushbu ulkan majmua O‘zbekiston iqtisodiyotida muhim ahamiyatga ega bo‘ladi. Chunki mamlakatimizda qora metallurgiya sanoati rivojlanmagan. Yangi korxonada yiliga 500 ming tonna rux va polimer qoplamali metall listlar ishlab chiqariladi. Ilgari bunday mahsulotlar asosan chetdan olib kelinardi”, — deyiladi xabarda.
Ta’kidlanishicha, bu zavodda import o‘rnini bosuvchi tovarlar ishlab chiqarilib, mamlakat iqtisodiyotida mahalliylashtirish darajasi sezilarli oshadi. Shuningdek, yiliga 90 million dollarlik mahsulot eksport qilinishi rejalashtirilgan. Majmuada 700 ga yaqin kishi ish bilan ta’minlanadi. Lekin turdosh tarmoqlar bilan birga 5 mingta yangi ish o‘rni yaratiladi.
Mazkur zavodni barpo etish 2017-yil fevralda boshlangan bo‘lib, qurilish ishlariga 420 million dollar sarflangan.
Prezidentning majmua ochilish marosimida ishtirok etishi, ishlab chiqarish jarayonlari bilan tanishishi ko‘zda tutilgan.
Avvalroq Rossiyaning “Metprom” muhandislik-qurilish guruhi prezidenti Andrey Deyneko Toshkent metallurgiya zavodi 4-dekabr kuni ochilishini ma’lum qilgandi. Zavodning qurilish loyihasi “Metprom” tomonidan yaratilgan — guruh ham loyihachi, ham loyihaning bosh pudratchisi sifatida ishtirok etgan
Eslatib o‘tamiz, Toshkent metallurgiya zavodi 2019-yilning dekabr oyida sovuq chigirish (xolodniy prokat) yo‘li bilan birinchi partiya metall mahsulotni ishlab chiqarishi to‘g‘risida xabar berilgandi.
Izoh (0)