O‘zbekistonda 2020-yilda 1 million 34 ming gektar maydonda g‘o‘za parvarish qilinib, 3 million 82 ming tonna paxta xomashyosi yetishtirildi, deya xabar bermoqda Qishloq xo‘jaligi vazirligi. Bu 2019-yilda yetishtirilgan hosilga nisbatan 9 foizga ko‘p, biroq belgilangan yalpi hosilga nisbatan 99,4 foizni tashkil etadi.
Paxta rejasini bajarish ko‘rsatkichlari hududlar kesimida quyidagicha ko‘rinish olgan:
- Farg‘ona viloyatida — 107,7 foiz;
- Xorazm viloyatida — 106,7 foiz;
- Andijon viloyatida — 106,6 foiz;
- Namangan viloyatida — 105,1 foiz;
- Toshkent viloyatida — 104,4 foiz;
- Samarqand viloyatida — 103,6 foiz;
- Qoraqalpog‘istonda — 102,7 foiz;
- Navoiy viloyatida — 102,7 foiz;
- Jizzax viloyatida — 100,7 foiz;
- Qashqadaryo viloyatida — 95,8 foiz;
- Sirdaryo viloyatida — 93,5 foiz;
- Buxoro viloyatida — 89,1 foiz;
- Surxondaryo viloyatida — 82,3 foiz.
Paxta yetishtiruvchi 136 ta tumandan paxta yig‘im-terimini tizimli tashkil etgan 104 tasi, 97 ta paxta-to‘qimachilik klasteridan 78 tasi, 11 ta paxta kooperatsiyasidan 8 tasi hamda 29 ming ta fermer xo‘jaliklaridan 23,0 mingtasi shartnomani bajargan.
Foto: Qishloq xo‘jaligi vazirligi
Respublikada har gektar paxta maydonida o‘rtacha hosildorlik 29,8 sentnerni tashkil qilgan.
Shuningdek, 2020-yilda faoliyat yuritgan 97 ta paxta-to‘qimachilik klasterlari tomonidan 927 ming gektar maydondan 2 million 794 tonna va 11 ta kooperatsiya tomonidan 106,6 gektar maydondan 288 ming tonna paxta xomashyosi yetishtirilgan.
Eslatib o‘tamiz, O‘zbekistonda 2020-yilgi paxta yig‘im-terimi mavsumida joylarda 2 570 dan ortiq tashkilot, fermer xo‘jaligi va klasterlarda o‘tkazilgan monitoring natijasida mehnat munosabatlariga rioya qilinishi yuzasidan 158 nafar mansabdor shaxs ma’muriy javobgarlikka tortilgan.
