“Yulduzlar jangi”dagi Dart Veyder roli bilan mashhurlikka erishgan britaniyalik aktyor Devid Prouz vafot etdi
Britaniyalik aktyor Devid Prouz 85 yoshida olamdan o‘tdi, deb xabar beradi BBC.
Marhumning agenti Tomas Bouingtonning so‘zlariga ko‘ra, Prouz “qisqa davom etgan kasallikdan so‘ng” vafot etgan.
“U turli maxluqlar rolini o‘ynagani bilan tanilgan bo‘lsa-da, biroq men va u bilan ishlagan barcha uchun haqiqiy qahramon edi”, — deydi Bouington.
“Yulduzlar jangi” filmida Lyuk Skayuoker rolini ijro etgan Mark Xemill sobiq hamkasbining vafotidan chuqur qayg‘uda ekanligini bildirgan.
“U mehribon inson edi, u Dart Veyder obrazidan ko‘ra, buyukroq edi. Aktyor, turmush o‘rtoq, ota, Britaniya imperiyasi Ordeni kavaleri, og‘ir atletika bo‘yicha uch karra Buyuk Britaniya chempioni va Yashil Xoch kodeksi Insoni edi. Uni muxlislar qanchalik yaxshi ko‘rsa, u ham shunchalik ularni yaxshi ko‘rardi”, — deb yozadi Xemill Twitter’dagi sahifasiga.
So sad to hear David Prowse has passed. He was a kind man & much more than Darth Vader. Actor-Husband-Father-Member of the Order of the British Empire-3 time British Weightlifting Champion & Safety Icon the Green Cross Code Man. He loved his fans as much as they loved him. #RIP pic.twitter.com/VbDrGu6iBz
— Mark Hamill (@MarkHamill) November 29, 2020
Devid Prouzning aktyorlik karyerasi 50 yildan ortiq davom etgan, biroq unga “Yulduzlar jangi”ning original trilogiyasidagi (1977—1983-yillar) Dart Veyder roli mashhurlik olib kelgan.
Shuningdek, Prouz Chubakka rolida ham o‘zini sinab ko‘rgan, biroq u natijada franshizaning asosiy salbiy qahramoniga aylangan.
Prouz aktyor sifatida o‘zining birinchi rolini Yan Flemingning Jeyms Bond romani asosida 1967-yilda suratga olingan “Kazino Royal”da, Frankenshteyn maxluqi sifatida ijro etgan. Shuningdek, aktyor Stenli Kubrikning “Murvatli apelsin”, “Doktor Kto” serialida, “Vamirlar sirki”, “Frankenshteyn va do‘zaxdan kelgan maxluq” kabi qator filmlarda rol o‘ynagan.
Eslatib o‘tamiz, 2019-yilning mayida “Yulduzlar jangi” filmida Chubakka rolini ijro etgan Piter Meyxyu 74 yoshida vafot etgandi.
