Parij va Fransiyaning boshqa shaharlarida “Global xavfsizlik to‘g‘risida”gi qonun loyihasiga qarshi minglab kishilar ishtirokidagi namoyishlar bo‘lib o‘tdi. Ushbu qonunning 24-moddasida politsiya xodimlariga zarar yetkazish maqsadida ularning suratlarini yoki videolarini tarqatganlik uchun 45 ming yevro va bir yil qamoq jazosi ko‘zda tutilgan. Qoidani buzganlar 45 ming yevro jarimaga tortilishi yoki 1 yilgacha qamalishi mumkin. Namoyishchilar bu so‘z erkinligiga qo‘pol tajovuz degan fikrda.
Qora tanli prodyuser Mishel Zeklerning ko‘chada niqobsiz yurgani uchun qo‘lga olinayotgan paytda politsiya xodimlari tomonidan kaltaklayotgani aks etgan video internet tarmog‘ida paydo bo‘lganidan so‘ng qonun loyihasiga qarshilik ayniqsa avj oldi. Fransiya prezidenti Emmanuel Makron politsiya xodimlarining shafqatsizligidan hayratdaligini bildirdi.
Ushbu video paydo bo‘lishidan bir necha kun avval mamlakat bosh vaziri Jan Kasteks 24-modda matniga o‘zgarish kiritishga va’da berganiga qaramay, (qonun loyihasi Senat tomonidan ma’qullanishi, prezident tomonidan imzolanishi kerak) Parijdagi Eyfel minorasi yaqinidagi Trokadero maydonida namoyishga chiqqan minglab kishilarni politsiyachilar vodomyot bilan tarqatishga uringandi. Bundan tashqari, gaz ballonlari ham ishga solingan.
Namoyishchilar qo‘llarida “Kim bizni politsiyadan himoya qiladi?”, “Politsiya zo‘ravonligiga chek qo‘ying!”, “Demokratiya bo‘g‘ilyapti”, deb yozilgan plakatlarni tutib olgan. Ko‘pchilik nafaqat himoya niqoblarida, balki ko‘zlarini bog‘ich bilan bog‘lab, qo‘llarida ochiq ko‘z rasmini ushlab olgan. Maydon markazidagi erkinlik, tenglik va birodarlik ramzini anglatuvchi haykal ko‘ziga ham bog‘ich boylab qo‘yishgan. Namoyishning aksariyat qismi tinch o‘tgan, ammo namoyishchilarning ayrim guruhi politsiya bilan to‘qnashgan. Bu holat mashinalar yoqib yuborilishi, ko‘zdan yosh oqizuvchi gaz qo‘llanilishi bilan yakunlangan. Quyida Meduza voqea aks etgan suratlarni taqdim etdi.
Izoh (0)