KXDR xakerlari deya taxmin qilinayotgan guruh Oksford universiteti bilan birgalikda koronavirus vaksinasini yaratayotgan Britaniya—Shvetsiyaning AstraZeneca kompaniyasiga qarshi kiberhujumni amalga oshirdi. Kiberjinoyatchilar kompaniya xodimlariga zarar kodlar o‘rin olgan xatlarni yuborgan, deb yozadi Reuters.
Xakerlar o‘zlarini ishga yo‘llovchi sifati ko‘rsatgan va Linkedln va WhatsApp orqali AstraZeneca xodimlariga ishga taklif borasida soxta xabarlar yuborgan. Xabarlar ichida “suhbatdoshning kompyuteridan foydalanish imkonini beradigan zararli kod” bo‘lgan.
Bu kabi xatlar kompaniyaning ko‘plab xodimlariga kelgan, jumladan, koronavirus vaksinasini yaratish ustida ish olib borayotganlarga ham. Biroq ta’kidlanishicha, bu xakerlarga muvaffaqiyat keltirmagan.
KXDR hukumati ham, AstraZeneca rahbariyati ham hozircha vaziyatga izoh bermagan.
Eslatib o‘tamiz, AstraZeneca farmasevtika kompaniyasi tomonidan ishlab chiqarilgan COVID-19 koronavirusga qarshi vaksina Buyuk Britaniya va Braziliyada o‘tkazilgan oraliq sinovlarda o‘rtacha 70 foiz samaradorligini ko‘rsatgan. Kompaniya o‘zi tomonidan yaratilgan vaksinadan foydalanishga ruxsat berilsa, 2021-yilda 3 milliard doza vaksina ishlab chiqarishga tayyor.
Izoh (0)