AQShning amaldagi prezidenti Donald Tramp xavfsizlik bo‘yicha sobiq maslahatchisi, Rossiya bilan aloqalar bo‘yicha FQBga yolg‘on axborot berganlikda ayblangan Maykl Flinni afv etdi. Bu haqda u o‘zining Twitter’dagi sahifasiga yozib qoldirgan.
“Men uchun general Maykl Flinn afv etilganini e’lon qilish katta sharaf. Uni va oilasini bu bilan tabriklayman. Bilaman, endi siz Shukronalik kunini ajoyib nishonlaysiz”, — deyiladi tvitda.
2017-yilda Maykl Flinn Rossiyaning o‘sha vaqtda Vashingtondagi elchisi bo‘lib ishlagan Sergey Kislyakov bilan uchrashuvi to‘g‘risida FQBga yolg‘on ma’lumot berganini tan olgan. FQB xodimlari Flinndan u diplomat bilan Rossiyaga qarshi sanksiyalar joriy etilishini muhokama qilgan yoki qilmagani haqida so‘ragan. Trampning maslahatchisi muhokama qilmadik, deya yolg‘on so‘zlagan.
Shundan keyin Trampning sobiq maslahatchisi tergov bilan hamkorlik qilishga qaror qilgan va o‘zini aybdor deb tan olgan. Biroq 2020-yil bahorida AQSh adliya vazirligida FQBda Flinni so‘roq qilish uchun yetarlicha asos bo‘lmagan degan xulosaga kelingan. Endilikda sud hokimiyati Flinndan barcha ayblovlarni olish masalasini ko‘rib chiqmoqda. Flinn esa endi o‘zini aybdor deb tan olmasligini e’lon qilgan. Shu sababli unga hukm chiqarilishi to‘xtatib qo‘yilgan.
Maykl Flinn 2017-yilning 20-yanvaridan 13-fevraliga qadar Trampning maslahatchisi lavozimida ishlagan.
The New York Times yozishicha, Donald Tramp 25-noyabr kuni 28 kishini afv etgan va yana 16 kishining jazosini yengillashtirgan.
Avvalroq AQSh prezidenti Donald Tramp Shukronalik kuni arafasida an’anaviy ravishda bir juft kurkani afv etgani to‘g‘risida xabar berilgandi.
Izoh (0)