Rossiyada besh yil ichida birinchi marta non savdosining o‘sishi qayd etildi, deb yozadi “Kommersant”, Rossiya novvoylar ittifoqiga tayanib.
BusinesStat tahlil kompaniyasi prognoziga ko‘ra, natural qiymatda non savdosi 2020-yil yakunlariga ko‘ra 60 ming tonnadan ortiqroqqa — 7,95 million tonnagacha o‘sishi mumkin. Pul qiymatida yanvar–sentabrda savdolar hajmi 2,9 foizga — 552,7 milliard rublgacha o‘sdi.
Rossiyaliklar daromadlarining pasayishi non savdosi o‘sishining sababi sifatida keltirilmoqda, shu sababli fuqarolar eng zarur mahsulotlarni ko‘proq sotib ola boshlagan.
Novvoylar ittifoqi taxmin qilishicha, mamlakatda iqtisodiy vaziyat barqarorlashganidan keyin non ishlab chiqarish qisqarishni boshlaydi.
“Rusprodsoyuz” uyushmasi ijrochi direktori Dmitriy Vostrikov ta’kidlashicha, eng arzon oziq-ovqatlardan biri sifatida non savdosi doim inqirozli davrlarda o‘sib boradi. Shunga o‘xshash tendensiya oxirgi marta uyushma tomonidan 2008-yilda qayd etilgan.
“Rosstat” ma’lumotlariga ko‘ra, 2020-yilning ikkinchi choragida rossiyaliklarning real daromadlari 8,4 foizga, uchinchi chorakda — 4,8 foizga pasaygan.
Avvalroq Moskva meri Sergey Sobyanin koronavirus infeksiyasi tarqalishi tufayli joriy qilingan bir qator cheklov choralari 2021-yil 15-yanvargacha uzaytirilishini e’lon qilgan edi.
Izoh (0)