AQShning saylangan prezidenti Jo Bayden 24-noyabr kuni o‘z ma’muriyatidagi asosiy tayinlovlarni shaxsan e’lon qildi. Bu haqda “Interfaks” xabar berdi.
“Bugun men o‘zimning ma’muriyatimdagi xalqaro siyosat va milliy xavfsizlik guruhidagi muhim lavozimlarga nomzodlar va xodimlarni e’lon qilishdan mamnunman. Aynan shu jamoa mamlakatimiz va xalqimiz xavfsizligini ta’minlaydi”, — dedi Bayden.
Bayden, xususan, davlat departamenti rahbari, milliy razvedka direktori, ichki xavfsizlik vaziri lavozimlariga nomzodlarni taqdim etdi.
Shunday qilib, Bayden AQSh davlat kotibining sobiq muovini Entoni Blinkenni Davlat departamenti rahbari etib tayinlashni rejalashtirayotganini tasdiqladi. “Blinken ma’muriyatning birinchi kunida ish boshlashga tayyor bo‘ladi”, — dedi Bayden.
Blinken 2013—2015-yillarda AQShning sobiq prezidenti Barak Obamaning milliy xavfsizlik bo‘yicha maslahatchisi o‘rinbosari bo‘lgan. Blinken Davlat departamenti rahbari lavozimiga asosiy nomzodlardan biri sifatida qaralgan va milliy xavfsizlik bo‘yicha maslahatchining o‘rinbosari lavozimida ishlagandan so‘ng, u 2015—2017-yillarda Obama davrida davlat kotibining o‘rinbosari lavozimiga ko‘tarilgan.
Bayden ichki xavfsizlik bo‘yicha sobiq maslahatchisi Alexandro Mallorkas uning ma’muriyatida ichki xavfsizlik vaziri lavozimini egallashini hamda bu lavozimda birinchi muhojir va lotin amerikalik bo‘lishini e’lon qildi.
2013—2017-yillarda AQSh davlat kotibi bo‘lib ishlagan Jon Kerri prezidentning iqlim masalalari bo‘yicha maxsus vakili bo‘ladi. Baydenning so‘zlariga ko‘ra, Kerrining tayinlanishi AQShda iqlim masalalarida yangi “tendensiyalar”ni namoyon etadi.
Bayden 2009—2013-yillarda AQSh davlat kotibi bo‘lgan Hillari Klintonning eng yaqin yordamchilaridan biri Jeyk Sallivanni AQSh prezidentining milliy xavfsizlik bo‘yicha maslahatchisi etib tayinlaydi. Sallivan, Blinken singari, Bayden AQSh vitse-prezidenti bo‘lganida uning milliy xavfsizlik bo‘yicha maslahatchisi bo‘lgan: 2009—2013-yillarda Blinken va 2013—2014-yillarda Sallivan.
Bayden AQSh Milliy xavfsizlik bo‘yicha maslahatchisining sobiq o‘rinbosari Avril Xeynsni Milliy razvedka direktori etib tayinlashga umid qilmoqda, bu lavozimni u 2015-yildan 2017-yilgacha egallagan. Bungacha Xeyns Markaziy razvedka boshqarmasi direktorining o‘rinbosari (2013—2015-yillarda) bo‘lgan. Bayden Xeyns tarixda Milliy razvedka direktori sifatida ishlagan birinchi ayol bo‘lishi mumkinligini ta’kidladi. “Biz Avril bilan xavfsizroqmiz”, — dedi Bayden.
Baydenning so‘zlariga ko‘ra, AQShning BMTdagi doimiy vakili Obamaning sobiq davlat kotibining Afrika bo‘yicha yordamchisi Linda Tomas-Grinfild bo‘ladi.
Bayden o‘z ma’muriyati a’zolarini tanishtirgan bo‘lsa-da, bu rasmiy emas, chunki bunday tayinlovlar AQSh qonunlariga muvofiq Senatning ma’qullashidan o‘tishi kerak.
Avvalroq Bloomberg o‘z manbalariga tayanib, yuqoridagi tayinlovlar haqida xabar bergandi.
Izoh (0)