Energetika vazirligi O‘zbekistonda sement ishlab chiqaruvchi zavodlarga elektr energiyasi yetkazib berilishi to‘xtamaganini ma’lum qildi.
“Bu yolg‘on ma’lumot bugun, 25-noyabr kuni 19 mingdan ziyod obunachiga ega bo‘lgan Telegram-kanallaridan birida joylashtirilgan. Mazkur Telegram-kanal egasi u qanday auditoriyani qamrab olishga qodir ekanini hisobga olgan holda har qanday yolg‘on ma’lumot tarqatish holati uchun javobgarlikni his qilishi lozim.
Mish-mishni tasdiqlovchi yoki inkor etuvchi vakolatli manbalarga murojaat qilmay turib, ‘tarmoq ma’lumotlariga asoslanib’ deb yozgan holda mazkur Telegram-kanali muallifi sement ishlab chiqaruvchi aniq korxonalarni tilga oladi va ularga elektr energiyasi yetkazib berish to‘xtatib qo‘yilganini ma’lum qiladi”, — deyiladi vazirlik xabarida.
“Kun.uz”ning dispetcherlik markazi ma’lumotlariga tayanib yozishicha, 24-noyabr kuni Ohangaron sement zavodiga 605 ming kVt.soat elektr energiyasi yetkazib berilgan bo‘lib, o‘rta hisobda bu zavodga kuniga 540 ming kVt.soat elektr energiyasi yetkazib beriladi. Jumladan, Quvasoy sement zavodi sutkasiga o‘rtacha 332 ming kVt.soat elektr energiyasi iste’mol qiladi.
Avvalroq Telegram’dagi Bakiroo kanali muallifi ijtimoiy tarmoqda bildirilgan ma’lumotga asoslanib, “sement ishlab chiqaruvchi gigantlar ‘Ohangaronsement’ va ‘Quvasoysement’ ishlab chiqarish quvvatlari gaz ta’minotidan uzilgan”i haqida yozgandi. Kanal muallifining qayd etishicha, bu holat garchi mavsum bo‘lmasa-da, sement narxlarining keskin ko‘tarilishiga olib kelgan.
Twitter‘dagi “Bobo” akkaunti egasi 25-noyabr kuni Ohangaron sement va Quvasoy sement zavodlari 2 oylik muddatga gaz ta’minotidan uzib qo‘yilgani haqida xabar bergan. “Birjada 500-550 so‘mga tushgan sement 2 kunda 50 so‘mga oshdi. Bu yil ham qurilishlarning asosi (bo‘lgan) sement 1000 so‘mdan o‘tadi, shekilli”, — deya fikr bildirgan tarmoq foydalanuvchisi.
Energetika vazirligi qonunchilikka muvofiq, jismoniy shaxs yolg‘on xabar tarqatgani uchun qonuniy javobgarlikka tortilishini eslatib o‘tgan.
“Ma’lum bir auditoriyaga mo‘ljallangan har qanday xabar tarqatayotgan kishi bu boradagi mas’uliyati va har qanday isbotini topmagan xabar, odamlarga mish-mishlar va tekshirilmagan ma’lumotlarni yetkazgani uchun javobgarlikka tortilishi mumkinligini aniq his qilishi lozim”, — deyiladi vazirlik xabarida.
Tovar xomashyo birja ma’lumotiga ko‘ra, 2020-yilning 20-noyabr kuni “Ohangaronsement” AJ tomonidan birja savdolariga qo‘yilgan portlandsementning (PSX) 1 tonnasi o‘rtacha 504 ming so‘mdan sotilgan. Shu kuni “Quvasoysement” AJ tomonidan savdoga qo‘yilgan M-400 sementining 1 tonnasi o‘rtacha 631 ming so‘mga sotilgan.
23-noyabr kuni “Ohangaronsement” AJ birja savdolarida ishtirok etmagan. Shuningdek, “Quvasoysement” AJ ham bozorda taklif bildirmagan. 20-noyabrda 40 ming 394 tonna turli sifatdagi sement birja savdolariga qo‘yilgan bo‘lsa, uch kun o‘tib ushbu ko‘rsatkich qariyb 9 ming tonnaga kamaygan. 24-noyabr kuni yakunlangan birja savdolarida 1 tonna sementning o‘rtacha narxi 520 so‘mgacha ko‘tarilgan bo‘lib, 4 kun ichida o‘rtacha 20 so‘mlik narx oshishi kuzatildi. “Ohangaronsement” AJ va “Quvasoysement” AJ birja savdolarida 24-noyabrda ham ishtirok etmagan.
Eslatib o‘tamiz, oktabr oxirlarida O‘zbekiston tovar xomashyo birjasida xaridorlar soni oshganiga qaramay, sement narxi tushayotgani to‘g‘risida xabar berilgandi.
Izoh (0)