O‘zbekiston terma jamoasi va “Bunyodkor” klubi bosh murabbiyi Vadim Abramov toshkentliklar sobiq yarim himoyachisi Jasur Jaloliddinovning “Lokomotiv”ga transferi atrofida yuzaga kelgan gaplar haqida o‘z fikrini bildirdi.
“Hamma o‘z ishini qilgani yaxshi. Tanqid o‘rinli bo‘lsa, bu o‘z foydasini beradi. Hozirda o‘zi tushunmagan sohaga aralashish urfda. Barcha jurnalistlarga Jasur Jaloliddinov transferi masalasida yozish qiziqarli bo‘ldi. Bu odamlarga qiziqarli edi, shu sabab ular bunga qo‘l urdi. Terma jamoa bosh murabbiyi sifatida meni uning o‘yin amaliyotisiz qolib ketayotgani xavotirga solmoqda. Negadir bu haqida so‘rashmaydi.
Men uchun ularning o‘yin amaliyotiga ega bo‘lishi juda muhim. Agar u yo‘q bo‘lsa, legionerlardan nima foyda? Bu masalani hech kim olib chiqmaydi, biroq gap transfer haqida borsa, bu hamma uchun qiziq”, — deydi Abramov.
“Daryo” ma’lumotnomasi
Jasur Jaloliddinov — 2002-yil 15-mayda Navoiyda tug‘ilgan. 2018-yil 2-avgust sanasida “Bunyodkor” safida Superliga doirasida debyut o‘yinini “Qo‘qon-1912”ga qarshi o‘tkazgan. U debyut qilgan vaqtda 16 yosh 80 kunlik edi. Bu orqali u O‘zbekiston chempionatida maydonga tushgan eng yosh futbolchiga aylangandi. 2019-yil oktabrida The Guardian talqiniga ko‘ra, dunyoning eng iste’dodli 60 futbolchisi ro‘yxatida qayd etilgan. 2019-yil yakunlariga ko‘ra, Superliganing eng yaxshi o‘yinchisi deb topilgan. 2019-yil dekabrida Italiyaning “Benevento” klubi ko‘rigida bo‘lgan.
2020-yil iyul oyida “Bunyodkor”ning o‘sha vaqtdagi direktori Ulug‘bek Mirzayev Jasur Jaloliddinov 350 ming yevro evaziga Moskvaning “Lokomotiv” klubiga o‘tayotganini tasdiqlagandi. Orada “Chempionat” nashri “Lokomotiv” Jaloliddinov uchun 1 million yevro sarflashini, mablag‘ning 100 ming yevrosi futbolchining “Bunyodkor” bilan amaldagi shartnomasini bekor qilishga, qolgan 900 ming yevro esa Jasurning agentlariga nasib etishi haqida ma’lum qildi. 29-iyul kuni esa moskvaliklar Jasurning transferini e’lon qildi. Avgust oyi avvalida “Bunyodkor” direktori Ulug‘bek Mirzayev ishdan ketgani aytildi. Shundan so‘ng avgust oyida Professional futbol ligasi Jasur Jaloliddinov transferida shubhali jihatlar borligini e’lon qilib, O‘zbekiston futbol assotsiatsiyasiga murojaat qilgani aytildi. Ushbu murojaat natijalari tashkilot rasmiy saytlarida e’lon qilinmadi. Ammo “Championat.asia” sayti ushbu masalada Ulug‘bek Mirzayev barchasini klub foydasiga hal etganini va tez orada uning o‘zi nashrga intervyu berishini e’lon qildi.
Qayd etish joiz, Jasur Jaloliddinov mavsum so‘ngiga qadar “Lokomotiv” tomonidan “Tambov” klubiga ijaraga berildi. U yangi jamoasida 7-raqam ostida harakat qiladi.
- “Jaloliddinov ishi”: “Bunyodkor” va “Lokomotiv” o‘rtasidagi vositachilar 550 ming yevroni o‘zlashtirgan
- Jasur Jaloliddinov nima sababdan “Beshiktosh” taklifini rad etganini ma’lum qildi
- Vadim Abramov O‘zbekiston terma jamoasidagi almashtirib bo‘lmas futbolchi kimligini aytdi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)