Aslida har qanday kasallik yoki sog‘liq bilan bog‘liq muammo kuzatilganda shifokorga murojaat qilish kerak, lekin mutaxassisga murojaat qilish mumkin bo‘lmagan vaqtda ushbu mahsulotlardan yordam olish mumkin.
Pechda pishirilgan kartoshka
Kartoshka gipertoniyani davolashda samarali hisoblangan ikki mikroelement – kaliy va magniyni o‘z ichiga oladi. Kaliyga boy bo‘lgan parhez qon bosimining oshishiga sabab bo‘ladigan natriyni organizmdan chiqarish xususiyatiga ega, magniy esa qon bilan ta’minlanishda muhim rol o‘ynaydi.
Sut mahsulotlari
Bir stakan sut tarkibidagi D vitamini qon bosimini 3-10 foizga tushiradi. Sut va sut mahsulotlarini muntazam iste’mol qilish yurak kasalliklariga chalinish xavfini 15 foizga kamaytiradi. Bundan tashqari, doimiy ravishda sut iste’mol qilish kalsiy yetishmovchiligini qoplaydi. Tadqiqotchilarning ta’kidlashiga qaraganda, ushbu mikroelement yetishmaganda gipertoniya rivojlanish xavfi yuqori bo‘ladi.
Tuxum
Uzoq vaqt davomida tuxum iste’mol qilish yurak uchun xavfli, deb hisoblangan. Ammo yaqinda o‘tkazilgan tadqiqotda tuxumning oqi qon bosimini pasaytirishga yordam berishi aniqlangan. Tuxum oqi qon bosimini tushirishda keng qo‘llaniladigan preparat – kaptopril singari ta’sirga ega.
Brokkoli
Ushbu sabzavotda qon bosimini tushirish xususiyatiga ega bo‘lgan foydali minerallar – kaliy, magniy va kalsiy mujassam. Shuningdek, ratsionga brokkolining kiritilishi insult, gipertoniya va yurak qon-tomir kasalliklarining oldini oladi.
Lavlagi sharbati
Amerikaning Hypertension kardiologlar uyushmasi 2013-yilda o‘tkazgan tadqiqotlarda bir stakan lavlagi sharbati qon bosimini tushirishini aniqlagan. Bunga uning tarkibidagi qon-tomirlar va qon aylanishi uchun foydali bo‘lgan nitrat sababchi hisoblanadi.
Banan
Ushbu meva kaliyni o‘zida mujassam qilish bo‘yicha chempion hisoblanadi. Bir dona bananda kundalik me’yorning 11 foizi hisoblangan 420 milligramm kaliy bo‘ladi.
Qora shokolad
Qora shokoladda qon-tomirlarning elastikligini oshiradigan antioksidant flavanollar miqdori ko‘p bo‘ladi. Shu sabab ham kun davomida qo‘rqmasdan bir necha bo‘lak shokolad yeyish tavsiya qilinadi.
Oq loviya
Tarkibida kaliy, magniy, kalsiy mujassam bo‘lgan va qon bosimini tushirish xususiyatiga ega bo‘lgan mahsulotlardan biri loviya hisoblanadi.
Anor
Uch hafta davomida har kuni bir stakandan anor sharbati ichish qon bosimining tushishiga yordam beradi.
Suli yormasidan tayyorlangan bo‘tqa
Salomatligi, xususan, qon bosimi haqida qayg‘uradiganlar uchun kunni suli yormasidan tayyorlangan bo‘tqa boshlash eng yaxshi variant hisoblanadi. Unda ko‘p miqdorda mujassam bo‘lgan kletchatka arterial qon bosimning sistolik va diastolik darajasini yaxshilaydi, vaznning me’yorda bo‘lishini hamda yurak va qon-tomirlar salomatligini ta’minlaydi.
Izoh (0)