Germaniya hukumati tarkibiga kiruvchi partiyalar nemis kompaniyalarining boshqaruv rayosatida ayollar uchun majburiy kvotalar joriy qilishga kelishib oldi. Bu haqda Financial Times nashriga tayanib “RBK” xabar berdi.
Kansler Angela Merkel boshchiligidagi Xristian-demokratik ittifoq / Xristian sotsial ittifoqi hukumron partiyalar uch va undan ortiq kishidan iborat kompaniya rahbariyati tarkibida kamida bir nafar ayol bo‘lishi kerakligi to‘g‘risida sostial-demokratlar bilan kelishuvga erishdi. Nashrning yozishicha, ushbu tashabbus “gender tenglikka qo‘yilgan katta qadam” sifatida qabul qilingan.
Tashabbusda, shuningdek, aksiyalar nazorat paketi hukumatga tegishli bo‘lgan kompaniyalar kuzatuv kengashining kamida 30 foiz o‘rni ayollarga tegishli bo‘lishini nazarda tutilgan. Sog‘liqni saqlash, pensiya va sug‘urta sohalaridagi davlat idoralarida ham ayollarga kvotalar ajratishi belgilangan. Adliya vazirligi ma’lumotiga ko‘ra, qaror yaqin oylarda Germaniya Vazirlar mahkamasi tomonidan qabul qilinadi.
Germaniyaning Oila, keksa fuqarolar, ayollar va yoshlar bo‘yicha vaziri Fransiska Giffay bu qarorni tarixiy yutuq deb atadi. “Yirik kompaniyalarni ayollarsiz boshqaruviga chek qo‘yamiz”, degan u. Giffayning ta’kidlashicha, 2015-yilda direktorlar kengashidagi ayollar uchun belgilangan ixtiyoriy kvota natija bermagan.
Financial Times’ning yozishicha, hukumat qarori yirik nemis biznesini tashvishga soldi. Kompaniya vakillarining fikricha, kengashda ayollar uchun majburiy kvotani belgilash tashkilotning ichki ishlariga aralashish hisoblanadi. Bundan tashqari, rahbarlik lavozimlariga mos keladigan ayol mutaxassislar kam.
AllBright shved-nemis jamg‘armasi ma’lumotlariga ko‘ra Germaniyadagi kompaniya boshqaruvidagi ayollar ulushi 12,8 foizni tashkil etadi, bu boshqa mamlakatlarga qaraganda past. Masalan, AQShda rahbarlik lavozimining 28,6 foizini, Buyuk Britaniyada 24,5 foizini, Shvesiyada 24,9 foizini ayollar egallagan.
2019-yilda Science Science jurnali investorlarning rahbariyatda ayollarning bo‘lishi daromadning pasayishiga olib kelishi mumkin, degan xulosasini e’lon qilgan.
Tadqiqotchilar 1889 ta kompaniya va ularning 14 yillik rentabelligi to‘g‘risidagi ma’lumotlarni tahlil qilgan. Ma’lum bo‘lishicha, direktorlar kengashida ayol kishi paydo bo‘lganida kompaniyalar aksiyalari narxi ko‘p hollarda tushgan, pasayish o‘rtacha ikki yil davom etgan. Direktorlar kengashida har bir yangi ayolning paydo bo‘lishi bilan kompaniyalar bozor qiymati 2,3 foizga pasaygan.
Qayd etilishicha, kompaniya rahbariyati gender tenglikni qo‘llab-quvvatlasa ham, boshqaruvga ayol kishi kelishi bilan ko‘p hollarda aksiyadorlar o‘z ulushlarini sotishga shoshiladi.