Endi fastfud taomlarini sotib olishning keragi yo‘q. Shunchaki lavash xamiridan uy sharoitida ishtahaochar yegulik tayyorlash mumkin.
Kerakli mahsulotlar:
- Lavash xamiri − 2 dona;
- Qiyma go‘shti − 300-400 gramm;
- Pishloq − 200 gramm;
- Piyoz − 1 dona;
- Sarimsoq − 1 bo‘lak;
- Tuxum − 1 dona;
- Ko‘kat, tuz va ziravorlar.
Piyoz va sarimsoq mayda to‘g‘raladi. Qiyma go‘shtiga to‘g‘ralgan mahsulotlar, ko‘kat, tuz va ziravorlar solib, yaxshilab aralashtiriladi. So‘ngra lavash xamiri teng ikkiga bo‘linib, yuzasiga qiymali aralashma bir tekisda yoyib chiqiladi.
Qiyma ustiga qirg‘ichdan o‘tkazilgan pishloq joylashtiriladi.
Avval xamirning ikki cheti buklanadi va rulet shaklida dumaloqlanadi. Shunda xamir chetidan masalliqlar chiqib ketmaydi.
Barcha xamirlar shu tarzda tayyorlab olinadi.
Xamirning yuzasi yumshoq va qizarib pishishi uchun tuxum sarig‘i suriladi.
Pechga 180 darajaga, o‘rta qismga qo‘yiladi. Agar iloji bo‘lsa, dastlabki 15 daqiqa davomida lavash yeguliklarni qandolat qog‘ozda o‘rab qo‘yish mumkin. Shunda yegulikning go‘shti yanada mazali pishadi, shuningdek, lavash xamiri qattiq bo‘lmaydi. Yegulik yana 35 daqiqadan so‘ng issiq holatida iste’mol qilish mumkin. Yoqimli ishtaha!
Izoh (0)