Turk aktyori O‘zjan Deniz sobiq rafiqasi Feyza Aktanga qarshi “urush ochdi”

“Turkiyaning Jorj Klunisi” — O‘zjan Deniz va uning sobiq turmush o‘rtog‘i Feyza Aktan o‘rtasidagi munosabatlar tobora yomonlashib bormoqda. Bu haqda “Kinoteka.com” xabar berdi.

2018-yilda turmush qurgan juftlik oradan 15 oy o‘tib birinchi sud jarayonidayoq ajrashgan. Shunga qaramay o‘zaro munosabatlar borasida tushunmovchiliklar tugamagan. Ta’kidlanishicha, ajrashganidan keyin Sariyerda joylashgan uyida yashashda davom etgan aktyorning rafiqasi go‘yoki uyni tark etishdan bosh tortgan. Deniz sobiq turmush o‘rtog‘idan uydan chiqib ketishi va kalitni berishini so‘ragan, ammo Aktan fikridan qaytmagan.

O‘zjan bunga javoban jinoiy ish qo‘zg‘atish uchun ariza bergan va sobiq rafiqasini, uyini okkupatsiya qilishda ayblagan. Shundan keyin Feyza shu vaqtgacha indamagani, ammo unga nisbatan nohaq munosabatda bo‘linganini ma’lum qilgan. Aktanning ushbu bayonotidan keyin O‘zjan ham qo‘l qovushtirib turmagan va o‘zining Instagram sahifasiga “O‘g‘lim, qo‘rqma. Otang qo‘lidan kelgan hamma narsani qiladi”, — deb yozib qoldirgan.

Ota bo‘lishni shishaga o‘xshatgan aktyor postida o‘g‘liga murojaat qilib, u aytilishi kerak bo‘lgan gaplarni aytgani, qilinishi kerak bo‘lgan ishlarni barchasini qilganini, u va o‘g‘li o‘rtasidagi muhabbat faqatgina Allohga ayonligini yozib, o‘g‘lini juda ham yashi ko‘rishi, hech kimga xafa qildirib qo‘ymasligini qo‘shimcha qilgan.

Keyingi yurish sobiq rafiqasidan bo‘lgan. Feyza ham Instagram’da dardini to‘kib-sochgan. Tamagirlik kuch va do‘q-po‘pisa bilan amalga oshiriladigan harakat ekanligini yozgan Feyza ajrashish qaroriga muvofiq ushbu uyda bolasi bilan yashashi mumkinligi, qolaversa, ajrashish shartlari boshqa tomon tarafidan tayyorlangani va keyin unga taqdim qilingani, matbuotda tarqalgan ma’lumotlardan farqli o‘laroq tovon puli, transport vositalari yoki ko‘chmas mulkka davosi bo‘lmagani va e’tirozsiz imzo chekkanini bildirgan. Shuningdek, u ajrashganidan keyin unga qo‘yilgan ayblovlar ko‘payishiga qaramay, farzandi zarar ko‘rmasligi uchun sukut saqlaganini qo‘shimcha qilgan.

Ma’lumot uchun, 2018-yilda turmush qurgan juftlik shu yilning aprel oyida farzandli bo‘lgan va uni Kuzey Deniz deb atagan. 15 oy birga yashaganidan keyin ajrashgan Deniz va Feyzaning har ikkisi ham farzandga vasiylik qilish huquqiga ega bo‘lgan.

Avvalroq ajrashganiga qaramay Feyza Aktan sobiq erining uyida yashashda davom etgani va tark etish so‘ralsa ham ketmagani ma’lum qilingan.