Namangan viloyatida joylashgan To‘raqo‘rg‘on IESning ikkita energoblogi avariyaviy to‘xtashi natijasida mazkur stansiya orqali energotizimga yetkazib berilayotgan quvvat 600 megavattga kamaygani haqida xabar berilgandi. Buning oqibatida Farg‘ona vodiysi viloyatlari, Toshkent shahri, Samarqand, Buxoro va Qashqadaryo viloyatlarida elektr energiyasi ta’minotida avtomatik ravishda cheklovlar kiritilgandi.
Energetika vazirligi matbuot xizmatining xabar berishicha, avariyaga qarshi tezkor brigada tomonidan nosozlik yuzaga kelgan mazkur IESning 1 va 2-energobloklari to‘liq quvvatda ishlashi ta’minlandi. “To‘raqo‘rg‘on IESda yuzaga kelgan nosozlik bartaraf etildi. Stansiya to‘liq quvvatda ishlamoqda”, — deyiladi vazirlik xabarida.
Vazirlikning ta’kidlashicha, iste’molchilar ehtiyojini ta’minlash uchun Taxiatosh IESning quvvati 280 megavatt bo‘lgan 1-energoblogi hamda Talimarjon IESning quvvati 450 megavatt bo‘lgan 2-energoblogi ham to‘liq quvvatda ishlashi ta’minlandi.
Izoh (0)