Farg‘ona viloyatidagi avtomobillarga gaz to‘ldirish shoxobchalari 2020-yil 19-noyabr kuni umuman faoliyat ko‘rsatmagan. Bunga zapravkalar faoliyatiga kiritilgan cheklovlar sabab bo‘limi mumkin deya xabar berdi “Daryo” muxbiri.
Ta’kidlanishicha, Farg‘onadagi 117 ta avtomobillarga gaz to‘ldirish shoxobchalari 2020-yil 1-noyabrdan boshlab tong soat 06:00 dan kech soat 18:00 gacha ishlash rejimiga o‘tkazilgan.
Kuz-qish mavsumida aholi va ijtimoiy soha obyektlarini uzluksiz ravishda tabiiy gaz bilan ta’minlash maqsadida avtomobillarga gaz to‘ldirish shoxobchalariga har kuni soat 18:00 dan tonggi soat 6:00 gacha gaz yetkazib berish vaqtincha to‘xtatilgan.
Qayd etilishicha, so‘nggi kunlarda viloyatdagi gaz zapravkalar oldida navbatlar yuzaga kelishni boshlagan. Ayrimlarida esa kunduzi ham gaz yetkazib berishda soatlab uzilishlar kuzatilmoqda.
Haydovchilarning ma’lum qilishicha, turnaqator navbatlar tufayli avtomobilga gaz to‘ldirish uchun ikki-uch soat, ba’zida besh-olti soat vaqt ketmoqda.
“Daryo” muxbirining qo‘shimcha qilishicha, 19-noyabr kuni viloyatdagi avtomobillarga metan gaz quyish shoxobchalari umuman ishlamagan.
Eslatib o‘tamiz, oldinroq Toshkentdagi tadbirkorlar gaz ta’minoti organi xodimlaridan 1-noyabrdan boshlab gaz uzatilishi o‘chirib qo‘yilishi to‘g‘risida ogohlantirish olayotgani ma’lum bo‘lgan. Energetika vazirligi tabiiy gazdan foydalanishiga doir bu kabi cheklovlarni “zarur chora” deb atagan. Keyinchalik Energetika vazirligi avtomobillarga gaz quyish kompressor shoxobchalariga (AGQKSh) gaz yetkazib berish shartlari ko‘rib chiqilayotganligini ma’lum qilgan.
Mavzuga doir:
Izoh (0)